ന്യൂഡല്‍ഹി: രാജ്യത്ത് രണ്ട് വയസിന് മുകളിലുള്ള കുട്ടികളില്‍ കൊവാക്സിന് കുത്തിവയ്‌പ്പിന് അനുമതി. രണ്ടിനും 18 നും ഇടയില്‍ പ്രായമുള്ള കുട്ടികള്‍ക്ക് അടിയന്തര ഉപയോഗത്തിനായി ഭാരത് ബയോടെക്കിന്‍റെ കൊവാക്സിന് സെന്‍ട്രല്‍ ഡ്രഗ് അതോറിറ്റിയുടെ വിദഗ്‌ധ സമിതി അംഗീകാരം നല്‍കി.
രണ്ടിനും 18 നും ഇടയില്‍ പ്രായമുള്ള കുട്ടികളിലെ വാക്സിനേഷന് പരീക്ഷണത്തില്‍ മൂന്ന് ട്രയലുകളില്‍ 2 എണ്ണം ഹൈദരാബാദ് ആസ്ഥാനമായുള്ള ഭാരത് ബയോടെക്ക് പൂര്‍ത്തീകരിച്ചിരുന്നു. ഇതുമായി ബന്ധപ്പെട്ട വിവരങ്ങള്‍ സെന്‍ട്രല്‍ ഡ്രഗ്‌സ് സ്‌റ്റാന്‍ഡേഡ് കണ്‍ട്രോള്‍ ഓര്‍ഗനൈസേഷന് (സിഡിഎസ്‌സിഒ) ഭാരത് ബയോടെക്ക് കൈമാറിയിരുന്നു. അതിനൊപ്പം ഈ മാസം മുതല്‍ അടിയന്തര ഉപയോഗത്തിനുള്ള അംഗീകാരത്തിനായി അനുമതിയും തേടി.