ലഖ്‌നൗ: കൊല്ലപ്പെട്ട കർഷകരുടെ കുടുംബങ്ങളെ കാണാൻ ലഖിംപൂർ ഖേരിയിലെത്തിയ കോൺഗ്രസ് ജനറൽ സെക്രട്ടറി പ്രിയങ്ക ഗാന്ധിയെ അറസ്റ്റ് ചെയ്‌തതായി യൂത്ത് കോൺഗ്രസ്. ഞായറാഴ്‌ച രാത്രി കാൽനടയായാണ് ലഖിംപൂർ ഖേരിയിൽ എത്തിച്ചേർന്നത്. എന്നാൽ, പ്രിയങ്കയെ ഹർഗാവിൽ വച്ച് ഇന്ന് പുലർച്ചെ 5.30ന് യുപി പൊലീസ് അറസ്റ്റ് ചെയ്‌തെന്നും സിതാപൂർ ജില്ലയിലെ പൊലീസ് സ്റ്റേഷനിലേക്ക് കൊണ്ടുപോയെന്നും കോൺഗ്രസ് ട്വിറ്ററിൽ അറിയിച്ചു.
ലഖ്‌നൗവിൽ നിന്ന് ലഖിംപൂർ ഖേരിയിലേക്കുള്ള യാത്രയിൽ ടോൾ പ്ലാസകളിൽ വലിയ പൊലീസ് സേനയെ വിന്യസിച്ചിരുന്നുവെന്നും ഇവിടെ ആക്‌ടിവിസ്റ്റുകൾക്കും മാധ്യമപ്രവർത്തകർക്കും വാഹനങ്ങൾ പാർക്ക് ചെയ്യാൻ അനുവദിച്ചിരുന്നില്ലെന്നും ട്വീറ്റിൽ പറയുന്നു.