ന്യൂഡല്‍ഹി: അഗ്നിപഥ് പദ്ധതിക്കെതിരായ കോണ്‍ഗ്രസിന്‍റെ സത്യഗ്രഹം ആരംഭിച്ചു. ഡല്‍ഹിയിലെ ജന്തര്‍ മന്തറില്‍ നടക്കുന്ന പ്രതിഷേധ പരിപാടിയില്‍ കോണ്‍ഗ്രസ് ജനറല്‍ സെക്രട്ടറി പ്രിയങ്ക ഗാന്ധി ഉള്‍പ്പെടെയുള്ള നേതാക്കള്‍ പങ്കെടുക്കുന്നുണ്ട്. പദ്ധതിക്കെതിരെ പ്രതിഷേധിക്കുന്ന യുവജനങ്ങള്‍ക്ക് ഐക്യദാര്‍ഢ്യം പ്രഖ്യാപിച്ച് കൊണ്ടാണ് കോണ്‍ഗ്രസ് പ്രതിഷേധം സംഘടിപ്പിക്കുന്നത്.
പ്രതിഷേധത്തോട് അനുബന്ധിച്ച് ജന്തര്‍ മന്തറില്‍ ഡല്‍ഹി പൊലീസ്, ദ്രുത കർമ സേനയെ വിന്യസിച്ചിട്ടുണ്ട്. നേരത്തെ പദ്ധതിക്കെതിരെ ട്വിറ്ററിലൂടെ രൂക്ഷ വിമര്‍ശനവുമായി രാഹുൽ ഗാന്ധി രംഗത്തെത്തിയിരുന്നു. രാജ്യത്തെ യുവജനങ്ങള്‍ക്ക് പൊള്ളയായ തൊഴില്‍ വാഗ്‌ദാനം നല്‍കി തൊഴിലില്ലായ്‌മയുടെ അഗ്നിപാതയിലൂടെ നടക്കാന്‍ പ്രധാനമന്ത്രി നരേന്ദ്ര മോദി നിര്‍ബന്ധിച്ചുവെന്ന് രാഹുല്‍ ഗാന്ധി വിമര്‍ശിച്ചു.