ന്യൂഡൽഹി : മുൻ കേരള മുഖ്യമന്ത്രി ഉമ്മൻചാണ്ടിയുടെ വിയോഗത്തിൽ അനുശോചനം രേഖപ്പെടുത്തി കോൺഗ്രസ് നേതാക്കൾ. മാതൃകാപരമായ അടിത്തറയുള്ള കോൺഗ്രസ് നേതാവായിരുന്നു ഉമ്മൻചാണ്ടിയെന്ന് രാഹുൽ ഗാന്ധി ട്വീറ്റിൽ കുറിച്ചു. കേരളത്തിലെ ജനങ്ങൾക്ക് വേണ്ടി അദ്ദേഹം ചെയ്‌ത ആജീവനാന്ത സേവനത്തിന്‍റെ പേരിൽ അദ്ദേഹം എന്നും സ്‌മരിക്കപ്പെടും. അദ്ദേഹത്തിന്‍റെ വേർപാടിൽ അനുശോചനം രേഖപ്പെടുത്തുന്നുവെന്ന് രാഹുൽ ഗാന്ധി ട്വിറ്ററിൽ കുറിച്ചു.
മുൻ കേരള മുഖ്യമന്ത്രി ഉമ്മൻചാണ്ടിയുടെ വിയോഗത്തിൽ അനുശോചനം രേഖപ്പെടുത്തി കോൺഗ്രസ് അധ്യക്ഷൻ മല്ലികാർജുൻ ഖാർഗെ. മുൻ കേരള മുഖ്യമന്ത്രി തന്‍റെ അചഞ്ചലമായ പ്രതിബദ്ധതയും ദീർഘവീക്ഷണമുള്ള നേതൃത്വവും സംസ്ഥാനത്തിന്‍റെ പുരോഗതിയിലും ദേശീയ രാഷ്ട്രീയത്തിലും മായാത്ത മുദ്ര പതിപ്പിച്ചിട്ടുണ്ടെന്ന് പാർട്ടി അധ്യക്ഷൻ മല്ലികാർജുൻ ഖാർഗെ ട്വിറ്ററിൽ കുറിച്ചു.
അനുശോചനം രേഖപ്പെടുത്തി മല്ലികാർജുൻ ഖാർഗെ : ജനങ്ങളോടുള്ള അദ്ദേഹത്തിന്‍റെ സമർപ്പണത്തിനും സേവനത്തിനും അദ്ദേഹം എക്കാലവും ഓർമിക്കപ്പെടുമെന്നും ഉമ്മൻ ചാണ്ടിയുടെ കുടുംബത്തിനും അദ്ദേഹത്തെ പിന്തുണച്ചവർക്കും അനുശോചനം രേഖപ്പെടുത്തുന്നുവെന്നും മല്ലികാർജുൻ ഖാർഗെ പറഞ്ഞു. മുൻ കേരള മുഖ്യമന്ത്രിയും ബഹുമാനപ്പെട്ട കോൺഗ്രസ് നേതാവുമായ ഉമ്മൻചാണ്ടിയുടെ വിയോഗത്തിൽ അഗാധമായ ദുഃഖമുണ്ടെന്ന് കോൺഗ്രസ് ട്വിറ്ററിൽ കൂട്ടിച്ചേർത്തു.
'രാഷ്ട്രീയത്തിലെ പ്രതിഭ, കേരളത്തിന്‍റെ പുരോഗതിക്കും വികസനത്തിനും അദ്ദേഹം നൽകിയ സംഭാവനകൾ എക്കാലവും സ്‌മരിക്കപ്പെടും. ഒരു യഥാർഥ രാഷ്ട്രതന്ത്രജ്ഞൻ, തലമുറകൾക്ക് പ്രചോദനം നൽകുന്ന ഒരു പാരമ്പര്യം അവശേഷിപ്പിക്കുന്നു. ഈ ദുഷ്‌കരമായ സമയത്ത് അദ്ദേഹത്തിന്‍റെ കുടുംബത്തിനും പ്രിയപ്പെട്ടവർക്കും ഞങ്ങളുടെ ഹൃദയംഗമമായ അനുശോചനം രേഖപ്പെടുത്തുന്നു.' മല്ലികാർജുൻ ഖാർഗെ ട്വീറ്റ് ചെയ്‌തു.
'അസാധാരണമായ വ്യക്തിത്വത്തിനുടമ' : ഉമ്മൻചാണ്ടിയുടെ മരണത്തിൽ കോൺഗ്രസ് നേതാവ് ജയറാം രമേശും ദുഃഖം രേഖപ്പെടുത്തി. രജ്‌ദീപ് സർദേശായിയുടെ ട്വീറ്റ് റീട്വീറ്റ് ചെയ്‌തുകൊണ്ടായിരുന്നു ജയറാം രമേശ് അനുശോചനം രേഖപ്പെടുത്തിയത്. അസാധാരണ വ്യക്തിത്വവും യഥാർഥ ബഹുജന നേതാവുമായിരുന്നു ഉമ്മൻ ചാണ്ടിയെന്ന് രജ്‌ദീപ് സർദേശായി പറഞ്ഞു. 'അസാധാരണമായ വ്യക്തിത്വവും യഥാർഥ ബഹുജന നേതാവുമായിരുന്നു ഉമ്മൻചാണ്ടി. വളരെ ലാളിത്യവും മര്യാദയുമുള്ള വ്യക്തിയായിരുന്നു. തന്‍റെ ഘടകകക്ഷികളുടെയും കേരളത്തിലെ ജനങ്ങളുടെയും ക്ഷേമത്തിനായി തനിക്കുള്ളതെല്ലാം നൽകുന്ന ഒരു 24×7 രാഷ്ട്രീയക്കാരനായിരുന്നു ഉമ്മൻ ചാണ്ടി'.
അദ്ദേഹത്തിന്‍റെ മുഖ്യമന്ത്രി പദവി നിരവധി നേട്ടങ്ങളാൽ ശ്രദ്ധേയമായിരുന്നു, അത് യുഎൻ വ്യാപകമായി പ്രശംസിക്കുകയും അംഗീകരിക്കുകയും ചെയ്‌തിരുന്നു. അദ്ദേഹത്തെ വർഷങ്ങളായി അറിയാനുള്ള ഭാഗ്യം തനിക്കുണ്ടായി. പത്ത് വർഷം മുമ്പ് അട്ടപ്പാടിയിലെ വിവിധ വാസസ്ഥലങ്ങളിൽ തങ്ങൾ നടത്തിയ സംയുക്ത സന്ദർശനങ്ങൾ ഇപ്പോഴും ഓർക്കുന്നുവെന്നും അദ്ദേഹം ട്വിറ്ററിൽ കുറിച്ചു.
'അദ്ദേഹത്തിന്‍റെ വിയോഗത്തിൽ അങ്ങേയറ്റം ദുഃഖം : നമ്മുടെ ഏറ്റവും പ്രിയപ്പെട്ട നേതാവും മുൻ മുഖ്യമന്ത്രിയുമായ ശ്രീ ഉമ്മൻചാണ്ടി വിടപറഞ്ഞതിൽ അങ്ങേയറ്റം ദുഃഖമുണ്ട്. കേരളത്തിലെ ഏറ്റവും ജനപ്രിയനും ചലനാത്മകവുമായ നേതാക്കളിലൊരാളായ ചാണ്ടി സാർ തലമുറകൾക്കും ജനവിഭാഗങ്ങൾക്കും പ്രിയപ്പെട്ടതാണ്'.