കോയമ്പത്തൂർ:ദുരഭിമാനക്കൊല ഭയന്ന് നടുറോഡില്‍ നിലവിളിച്ച് സഹായം തേടി ദമ്പതികൾ. തമിഴ്‌നാട് മണിയക്കാരംപാളയം സ്വദേശി വിഘ്‌നേഷ്, ശരവണംപട്ടി സ്വദേശി സ്‌നേഹ ദമ്പതികളാണ് കുടുംബം തങ്ങളെ കൊലപ്പെടുത്തുമെന്ന ഭയത്താൽ അലറി വിളിച്ചുകൊണ്ട് തെരുവില്‍ സഹായം അഭ്യർഥിച്ചത്. ഇന്നലെ (മാർച്ച് 02) രാത്രി അവിനാശി റോഡിൽ വച്ചായിരുന്നു സംഭവം.
പൊലീസ് നൽകുന്ന വിവരമനുസരിച്ച് അടുത്തിടെയാണ് വിഘ്‌നേഷും സ്‌നേഹയും വിവാഹിതരായത്. എന്നാൽ വ്യത്യസ്‌ത ജാതിയായതിനാൽ വിവാഹത്തിൽ സ്‌നേഹയുടെ വീട്ടുകാർക്ക് താൽപ്യമുണ്ടായിരുന്നില്ലെന്ന് ദമ്പതികൾ ആരോപിക്കുന്നു. തുടർന്ന് ക്ഷേത്രത്തിൽ കൊണ്ടുപോകാനെന്ന വ്യാജേന ഇരുവരെയും വിളിച്ചുവരുത്തി കൊലപ്പെടുത്താൻ ശ്രമിച്ചതായാണ് ദമ്പതികൾ പറയുന്നത്.
തങ്ങളെ കടത്തികൊണ്ടുപോകാൻ ശ്രമിക്കുകയാണെന്ന് കരഞ്ഞുവിളിച്ച ദമ്പതികൾ റോഡിലുണ്ടായിരുന്ന ആളുകളുടെയും ട്രാഫിക് പൊലീസിന്‍റെയും സഹായം ആവശ്യപ്പെടുകയായിരുന്നു. സ്‌നേഹയുടെ കുടുംബത്തോടൊപ്പം കാറിൽ സഞ്ചരിക്കുന്നതിനിടെ വാഹനത്തിലുണ്ടായിരുന്ന ബന്ധു ആയുധമുയർത്തിയതോടെ ഇരുവരും നിലവിളിക്കുകയായിരുന്നു.