വിവേകാനന്ദന്‍ മതേതരത്വത്തിനായി നിലകൊണ്ടു, യുവത അദ്ദേഹത്തിന്‍റെ ആദര്‍ശം പിന്തുടരണം : എൻ.വി രമണ

സുപ്രീം കോടതി ചീഫ് ജസ്റ്റിസിന്‍റെ പരാമര്‍ശം വിവേകാനന്ദ ഇൻസ്റ്റിറ്റ്യൂട്ട് ഓഫ് ഹ്യൂമൻ എക്‌സലൻസിന്‍റെ 22-ാമത് സ്ഥാപക ദിനാഘോഷ ചടങ്ങില്‍

ഹൈദരാബാദ് : രാജ്യത്തെ യുവത സ്വാമി വിവേകാനന്ദന്‍റെ ആദർശങ്ങൾ വളർത്തിയെടുക്കണമെന്ന ആഹ്വാനവുമായി സുപ്രീം കോടതി ചീഫ് ജസ്റ്റിസ് എൻ.വി രമണ. ഡല്‍ഹിയിലെ വിവേകാനന്ദ ഇൻസ്റ്റിറ്റ്യൂട്ട് ഓഫ് ഹ്യൂമൻ എക്‌സലൻസിന്‍റെ 22-ാമത് സ്ഥാപക ദിനാഘോഷത്തിൽ വെർച്വലായി പങ്കെടുത്ത് സംസാരിക്കുകയായിരുന്നു അദ്ദേഹം.

വിവേകാനന്ദൻ രാജ്യത്ത് മതേതരത്വം എന്ന ആശയത്തിനായി വാദിച്ചു. മതത്തിന്‍റെ യഥാർഥ സാരാംശം പൊതുനന്മയും സഹിഷ്‌ണുതയുമാണെന്ന് അദ്ദേഹം ഉറച്ചുവിശ്വസിച്ചു. മതം അന്ധവിശ്വാസങ്ങൾക്കും മുകളിലായിരിക്കണം.

പൊതുനന്മയുടെയും സഹിഷ്‌ണുതയുടെയും തത്വങ്ങളിലൂടെ ഇന്ത്യയെ പുനരുജ്ജീവിപ്പിക്കാന്‍ നാം സ്വാമിയുടെ ആദർശങ്ങൾ ഉൾക്കൊള്ളണം. സ്വാതന്ത്ര്യ സമരകാലത്ത് യുവാക്കൾ ചെയ്‌ത ത്യാഗങ്ങൾ ചീഫ് ജസ്റ്റിസ് അനുസ്‌മരിച്ചു. അനീതിയെ ചെറുക്കാനുള്ള കഴിവ് യുവാക്കൾക്കുണ്ടെന്നും അദ്ദേഹം അഭിപ്രായപ്പെട്ടു.