ന്യൂഡൽഹി: ആന്ധ്രാപ്രദേശ് നൈപുണ്യ വികസന കോർപ്പറേഷൻ അഴിമതി കേസില്‍ തനിക്കെതിരായ എഫ്ഐആർ റദ്ദാക്കാന്‍ സുപ്രീം കോടതിയെ സമീപിച്ച് മുന്‍ മുഖ്യമന്ത്രിയും തെലുങ്കുദേശം പാർട്ടി (ടി ഡി പി) നേതാവുമായ ചന്ദ്രബാബു നായിഡു (Chandrababu Naidu Moves SC Challenging Refusal to Quash FIR). 2021 ഡിസംബർ ഒമ്പതിന് സമർപ്പിച്ച എഫ്ഐആർ റദ്ദാക്കാൻ ആന്ധ്രാപ്രദേശ് ഹൈക്കോടതി വിസമ്മതിച്ചത് ചോദ്യം ചെയ്‌താണ് നായിഡു സുപ്രീം കോടതിയെ സമീപിക്കുന്നത്. കേസ് രാഷ്ട്രീയപ്രേരിതമാണെന്നും മുഖ്യമന്ത്രി വൈ എസ് ജഗൻമോഹൻ റെഡ്ഡിയുടെ നിർദേശപ്രകാരമാണ് അറസ്റ്റെന്നും ചൂണ്ടിക്കാട്ടിയാണ് നായിഡു ഹൈക്കോടതിയെ സമീപിച്ചത്. എന്നാല്‍ അന്വേഷണത്തിന്‍റെ അവസാന ഘട്ടത്തിൽ ഇടപെടാനാകില്ലെന്ന് ചൂണ്ടിക്കാട്ടി ആന്ധ്രാ ഹൈക്കോടതി ഹർജി തള്ളുകയായിരുന്നു.
21 മാസം മുമ്പ് രജിസ്റ്റർ ചെയ്ത എഫ്‌ഐആറിൽ പെട്ടെന്ന് തന്‍റെ പേര് വന്നെന്നും നിയമവിരുദ്ധമായ രീതിയിൽ അറസ്റ്റ് ചെയ്യപ്പെട്ടെന്നും രാഷ്ട്രീയ കാരണങ്ങളാൽ മാത്രം തന്‍റെ സ്വാതന്ത്ര്യം നഷ്ടപ്പെടുത്തിയെന്നും നായിഡുവിന്‍റെ ഹർജിയിൽ പറയുന്നു. ഭരണപ്രതികാരവും ഏറ്റവും വലിയ പ്രതിപക്ഷമായ തെലുങ്കുദേശം പാർട്ടിയെ അട്ടിമറിക്കാനുള്ള സംഘടിത പ്രചാരണമാണിതെന്നും നായിഡു ഹര്‍ജിയില്‍ പറഞ്ഞു.
ഒരു ജനപ്രതിനിധി തന്‍റെ ഭരണകാലയളവില്‍ ചെയ്ത ഏതെങ്കിലും ശുപാർശയുമായോ തീരുമാനവുമായോ ബന്ധപ്പെട്ട കുറ്റകൃത്യത്തെക്കുറിച്ച് ഒരു പൊലീസ് ഉദ്യോഗസ്ഥന് ബന്ധപ്പെട്ട അധികൃതരുടെ മുന്‍കൂര്‍ അനുമതിയില്ലാതെ അന്വേഷണം നടത്താന്‍ കഴിയില്ലെന്നാണ് സുപ്രീം കോടതിയുടെയും വിവിധ ഹൈക്കോടതികളുടെയും വിധികള്‍ ഉദ്ധരിച്ച് നായിഡുവിന്‍റെ അഭിഭാഷകന്‍ ഹര്‍ജിയില്‍ ചൂണ്ടിക്കാട്ടിയത്.