ന്യൂഡല്‍ഹി: ചണ്ഡീഗഢ് വിമാനത്താവളത്തിന് ധീര രക്തസാക്ഷി ഭഗത് സിങ്ങിന്‍റെ പേര് നല്‍കുമെന്ന് പ്രഖ്യാപിച്ച് പ്രധാനമന്ത്രി നരേന്ദ്ര മോദി. ഇന്ന് (25.09.2022) നടന്ന മന്‍ കി ബാതിനിടെയാണ് പ്രഖ്യാപനം. ധീരനായ സ്വാതന്ത്ര്യ സമര സേനാനി ഭഗത് സിങ്ങിനോടുള്ള ആദര സൂചകമായാണ് വിമാനത്താവളത്തിന് അദ്ദേഹത്തിന്‍റെ പേര് നല്‍കുന്നതെന്ന് പ്രധാനമന്ത്രി പറഞ്ഞു.
സെപ്റ്റംബർ 28 ന് ഭഗത് സിങ്ങിന്‍റെ ജന്മദിനം വരാനിരിക്കെയാണ് പ്രധാനമന്ത്രിയുടെ സുപ്രധാന തീരുമാനം. കാലാവസ്ഥ വ്യതിയാനം സമുദ്ര ആവാസവ്യവസ്ഥയ്‌ക്ക്‌ വലിയ ഭീഷണിയാണെന്നും ബീച്ചുകളിലെ മാലിന്യം അസ്വസ്ഥതയുണ്ടാക്കുന്നുവെന്നും മോദി മൻ കി ബാതില്‍ പറഞ്ഞു. ഈ വെല്ലുവിളികളെ നേരിടാൻ ഗൗരവമേറിയതും നിരന്തരവുമായ ശ്രമങ്ങൾ നടത്തേണ്ടത് നമ്മുടെ ഉത്തരവാദിത്തമാണെന്നും അദ്ദേഹം പറഞ്ഞു.