ന്യൂഡൽഹി :10 ലക്ഷം കൊവിഷീൽഡ് ഡോസുകൾ വാങ്ങാൻ കേരള സര്‍ക്കാര്‍ ഉടമസ്ഥതയിലുള്ള കേരള മെഡിക്കല്‍ സര്‍വീസ് കോര്‍പറേഷന്‍ ലിമിറ്റഡിന് കേന്ദ്ര അനുമതി. സ്വകാര്യ മേഖല ക്വാട്ടയിലെ 25 ശതമാനമാണ് സംസ്ഥാനത്തിന് ലഭിക്കുക. കേന്ദ്ര ആരോഗ്യ മന്ത്രാലയ വൃത്തങ്ങൾ തിങ്കളാഴ്‌ച ഇക്കാര്യം പുറത്തുവിടുകയായിരുന്നു.
കൊവിഡ് കേസുകള്‍ വര്‍ധിക്കുന്ന സാഹചര്യത്തില്‍ ഓഗസ്റ്റ് മാസം ആദ്യം സെറം ഇൻസ്റ്റിറ്റ്യൂട്ട് ഓഫ് ഇന്ത്യയെ (എസ്‌.ഐ.ഐ) സംസ്ഥാനം സമീപിച്ചിരുന്നു. എസ്‌.ഐ.ഐയുടെ സര്‍ക്കാര്‍ നിയന്ത്രണ കാര്യ ഡയറക്ടർ പ്രകാശ് കുമാർ സിങ് ഇതിനായി ആരോഗ്യ മന്ത്രാലയവുമായി ബന്ധപ്പെടുകയും കേരളത്തിനുള്ള അനുമതി തേടുകയും ചെയ്‌തു.