രാജ്യത്തെ ഇന്ധനവില കുറക്കാൻ കേന്ദ്രം തയാറാവണമെന്ന് ഒ.പനീര്‍ ശെല്‍വം

പെട്രോൾ, ഡീസൽ വിലക്കയറ്റത്തിന്‍റെ ഉത്തരവാദിത്വം സംസ്ഥാന സർക്കാരിന്‍റെ തലയിൽ കെട്ടിവെക്കാനാണ് പ്രതിപക്ഷമായ ഡിഎംകെ ശ്രമിക്കുന്നതെന്നും പനീർ സെൽവം പറഞ്ഞു

ചെന്നൈ:സംസ്ഥാനത്തിന് നികുതി വരുമാനത്തിനായി വേറെ മാർഗങ്ങൾ കുറവായതിനാൽ പെട്രോളിയം ഉൽ‌പന്നങ്ങളുടെ നികുതി കുറയ്ക്കാൻ കേന്ദ്രം തയ്യാറാവണമെന്ന് തമിഴ്‌നാട് ഉപമുഖ്യമന്ത്രി ഒ.പനീര്‍ സെൽവം. തമിഴ്‌നാട് നിയമസഭാ ഇടക്കാല ബജറ്റിനെതിരെ പ്രതിപക്ഷം ഉയർത്തിയ ആരോപണങ്ങൾക്ക് മറുപടിയായാണ് പനീർ സെൽവം ഇക്കാര്യം പറഞ്ഞത്. പെട്രോൾ ഡീസൽ വിലക്കയറ്റത്തിന്‍റെ ഉത്തരവാദിത്വം സംസ്ഥാന സർക്കാരിന്‍റെ തലയിൽ കെട്ടിവെക്കാനാണ് പ്രതിപക്ഷമായ ഡിഎംകെ ശ്രമിക്കുന്നതെന്ന് പനീർ സെൽവം പറഞ്ഞു.

പെട്രോളിന്‍റെയും ഡീസലിന്‍റെയും വിലയിൽ അസാധാരണമായ മാറ്റങ്ങൾ പ്രതീക്ഷിച്ച് നികുതി ഏർപ്പെടുത്തുന്ന രീതി കഴിഞ്ഞ വർഷം സർക്കാർ പരിഷ്കരിച്ചിരുന്നു. പഴയ സമ്പ്രദായം പിന്തുടർന്നിരുന്നുവെങ്കിൽ ഇന്ധന വിലക്കയറ്റ സമയത്ത് സംസ്ഥാന സർക്കാരിന് കൂടുതൽ വരുമാനം ലഭിക്കാൻ സാധ്യതയുണ്ടായിരുന്നു. എന്നാൽ വിലക്കയറ്റത്തിൽ നിന്ന് ജനങ്ങളെ സംരക്ഷിക്കുന്നതിനാണ് സർക്കാർ നികുതി സമ്പ്രദായത്തിൽ മാറ്റം വരുത്തിയതെന്നും അദ്ദേഹം പറഞ്ഞു. പെട്രോളിന് പരസ്യ മൂല്യവർദ്ധന നികുതി 24 ശതമാനത്തിൽ നിന്ന് 15 ശതമാനമായി കഴിഞ്ഞ വർഷം കുറച്ചിരുന്നു. ഡീസലിന് ഇത് 25 ശതമാനത്തിൽ നിന്ന് 11 ശതമാനമായും കുറച്ചു. തമിഴ്‌നാട്ടിൽ സർക്കാരുകൾ എക്സൈസ് തീരുവ നിരവധി തവണ വർധിപ്പിച്ചിട്ടുണ്ട്. എന്നാൽ 2011 മുതൽ 2017 വരെ തമിഴ്‌നാട്ടിൽ നികുതി സമ്പ്രദായത്തിൽ ഒരു മാറ്റവും ഉണ്ടായില്ലെന്നും അദ്ദേഹം പറഞ്ഞു.

കേന്ദ്രത്തിന്‍റെ അധിക സെസും ചാർജും സംസ്ഥാന സർക്കാരിന്‍റെ വരുമാനത്തെ ബാധിച്ചിട്ടുണ്ട്. 2020 ഏപ്രിൽ മുതൽ നവംബർ വരെ കേന്ദ്രത്തിനന്‍റെ എക്സൈസ് തീരുവ മോപ്പ് അപ്പ് 48 ശതമാനം വർധിച്ചപ്പോൾ തമിഴ്‌നാട് സർക്കാരിന്‍റെ എക്സൈസ് വരുമാന വിഹിതം 39.40 ശതമാനമായി ഇടിഞ്ഞു. അതിനാൽ കേന്ദ്രം പെട്രോളിയം നികുതി കുറക്കാൻ തയാറാകണമെന്നും അദ്ദേഹം പറഞ്ഞു. എന്നാൽ ഇന്ധന വിലക്കയറ്റത്തിനെതിരെ ഉയർന്ന പ്രതിഷേധത്തിനിടയിൽ സംസ്ഥാന സർക്കാരുകൾക്കും പെട്രോൾ ഡീസൽ നികുതി കുറക്കാമെന്ന് കേന്ദ്ര ധനമന്ത്രി നിർമ്മല സീതാരാമൻ പറഞ്ഞിരുന്നു.