ന്യൂഡൽഹി: പുതിയ കാർഷിക നിയമങ്ങൾക്കെതിരെ പ്രതിഷേധിക്കുന്ന കര്‍ഷക സംഘടനാ പ്രതിനിധികളുമായി കേന്ദ്ര സര്‍ക്കാര്‍ നടത്തിയ ചര്‍ച്ച പരാജയം . പുതിയ കാർഷിക നിയമങ്ങളുമായി ബന്ധപ്പെട്ട പ്രശ്നങ്ങൾ അന്വേഷിക്കുന്നതിനായി അഞ്ചംഗ സമിതി രൂപീകരിക്കാനുള്ള സർക്കാരിന്‍റെ നിർദേശവും കർഷക സംഘടനകൾ നിരസിച്ചുവെന്ന് ഭാരത് കിസാൻ യൂണിയൻ (ഏക്ത ഉഗ്രഹാൻ) അംഗം രൂപ്‌സിങ് സിൻഹ പറഞ്ഞു. പുതിയ നിയമങ്ങൾക്കെതിരെ പ്രതിഷേധിക്കുന്ന കർഷകരുടെ ഏറ്റവും വലിയ സംഘടനകളില്‍ ഒന്നാണിത്. എന്നിരുന്നാലും, പ്രശ്നങ്ങൾ പരിശോധിക്കാൻ ഉന്നതതല സമിതി രൂപീകരിക്കണമെന്ന നിലപാടിൽ സർക്കാർ പക്ഷം ഉറച്ചുനിന്നു. കർഷക പ്രതിനിധികൾ ഈ നിർദേശം പരിഗണിക്കണമെന്ന് സര്‍ക്കാര്‍ പ്രതിനിധികള്‍ ആവശ്യപ്പെട്ടു. മൂന്ന് കേന്ദ്രമന്ത്രിമാരുമായുള്ള മാരത്തൺ യോഗത്തിൽ 35 കര്‍ഷക സംഘടന സംഘടനാ പ്രതിനിധികള്‍ പങ്കെടുത്തിരുന്നു. ഡിസംബര്‍ മൂന്ന് വ്യാഴാഴ്‌ച വീണ്ടും ചര്‍ച്ച നടത്താൻ സര്‍ക്കാര്‍ തയാറായിട്ടുണ്ടെന്ന് മീറ്റിങ്ങിന് ശേഷം കര്‍ഷക നേതാക്കള്‍ അറിയിച്ചു. പിന്നാലെ സര്‍ക്കാരും ഇത് ഔദ്യോഗികമായി പ്രഖ്യാപിച്ചു.
കര്‍ഷകരുടെ താൽപ്പര്യത്തിന് വിരുദ്ധമാണെന്ന് ആരോപിക്കുന്ന മൂന്ന് നിയമങ്ങളും റദ്ദാക്കണമെന്ന് കർഷക പ്രതിനിധികൾ ഐകകണ്ഠേന ചര്‍ച്ചയില്‍ പറഞ്ഞു. പുതിയ നിയമങ്ങൾ കർഷകർക്ക് മികച്ച അവസരങ്ങൾ നൽകുമെന്നും കാർഷിക മേഖലയിലെ പുതിയ സാങ്കേതികവിദ്യകൾ കൊണ്ടുവരുമെന്നും സർക്കാർ പ്രതിനിധികള്‍ പറഞ്ഞെങ്കിലും കര്‍ഷകര്‍ അംഗീകരിച്ചില്ല. കേന്ദ്ര കാർഷിക മന്ത്രി നരേന്ദ്ര സിങ് തോമറിനൊപ്പം റെയിൽ‌വേ, വാണിജ്യ, വ്യവസായ മന്ത്രി പീയൂഷ് ഗോയൽ, പഞ്ചാബ് എംപിയായ വാണിജ്യ സഹമന്ത്രി സോം പ്രകാശ് എന്നിവരും പങ്കെടുത്തിരുന്നു.