ന്യൂഡല്‍ഹി: സിബിഎസ്ഇ 10, 12 ക്ലാസുകളിലെ ഒന്നാം ടേം പരീക്ഷയുടെ ഫലം ഇന്ന് പ്രഖ്യാപിക്കില്ല. എന്നാല്‍ ഈ ആഴ്‌ച തന്നെ ഫലപ്രഖ്യാപനം ഉണ്ടാകുമെന്ന് സിബിഎസ്ഇ കണ്‍ട്രോളര്‍ ഓഫിസര്‍ അറിയിച്ചു. ആദ്യം 12-ാം ക്ലാസ്‌ പരീക്ഷ ഫലം പുറത്തുവിടും. ഇതിന് ശേഷമായിരിക്കും 10-ാം ക്ലാസിന്‍റേത് പ്രഖ്യാപിക്കുക. വെള്ളിയാഴ്‌ചയോടെ 12-ാം ക്ലാസ്‌ ഫലം പ്രഖ്യാപിക്കുമെന്നാണ് സൂചന. ഫലം പ്രഖ്യാപിക്കുന്നതിനായുള്ള നടപടി ക്രമങ്ങൾ പൂർത്തിയായതായി ഉന്നത വൃത്തങ്ങൾ അറിയിച്ചു.
കഴിഞ്ഞ വർഷം ഡിസംബറിൽ നടത്തിയ പരീക്ഷകളുടെ ഫലമാണ് പ്രഖ്യാപിക്കുന്നത്. ജനുവരിയിൽ പ്രസിദ്ധീകരിക്കുമെന്ന് പ്രതീക്ഷിച്ചിരുന്നെങ്കിലും പല കാരണങ്ങളാൽ വൈകുകയായിരുന്നു.