അമരാവതി : മുൻ മുഖ്യമന്ത്രിയും തെലുങ്കുദേശ പാർട്ടി ദേശീയ അധ്യക്ഷനുമായ എൻ.ചന്ദ്രബാബു നായിഡുവിനെതിരെ വധശ്രമത്തിനും ഗൂഢാലോചനയ്ക്കും കേസെടുത്ത് പൊലീസ്. ചന്ദ്രബാബു നായിഡുവിനും മറ്റ് 20 പാർട്ടി നേതാക്കൾക്കുമെതിരെ കൊലപാതകശ്രമം, ക്രിമിനൽ ഗൂഢാലോചന എന്നീ കുറ്റങ്ങൾ ചുമത്തി മുടിവിഡു പൊലീസാണ് കേസെടുത്തത്. ആന്ധ്രാപ്രദേശിലെ അണ്ണമയ്യ ജില്ലയിലെ തമ്പല്ലപ്പള്ളി നിയോജക മണ്ഡലത്തിൽ അടുത്തിടെയുണ്ടായ സംഘർഷങ്ങളുടെ പശ്ചാത്തലത്തിലാണ് കേസ് രജിസ്റ്റർ ചെയ്‌തിരിക്കുന്നത്.
വൈഎസ്ആർസിപി നേതാവ് ഉമാപതി റെഡ്ഡിയുടെ പരാതിയില്‍ മുടിവിഡു പോലീസ് സ്റ്റേഷനില്‍ രജിസ്റ്റർ ചെയ്ത കേസില്‍ ചന്ദ്രബാബു നായിഡുവിനെ ഒന്നാം പ്രതിയാക്കി. മുൻ മന്ത്രി ദേവിനേനി ഉമ, മുതിർന്ന നേതാവ് അമർനാഥ് റെഡ്ഡി, എംഎൽസി രാംഗോപാൽ റെഡ്ഡി, നല്ലാരി കിഷോർ കുമാർ റെഡ്ഡി എന്നിവരെയും കേസിൽ പ്രതി ചേർത്തിട്ടുണ്ട്. കൂടാതെ ഇവർക്കൊപ്പം ദമ്മലപതി രമേഷ്, റെഡ്ഡെപ്പഗരി ശ്രീനിവാസ റെഡ്ഡി, ഗന്ത നരഹരി, ശ്രീറാം ചിനബാബു, പുലവർത്തി നാനി, തുടങ്ങിയവരും പ്രതികളായി.
രായലസീമ മേഖലയിലെ ജലസേചന പദ്ധതികളുടെ സ്ഥിതി പരിശോധിക്കുന്നതിനിടെ അനഗല്ലു നഗരത്തിൽ അക്രമങ്ങള്‍ പൊട്ടിപുറപ്പെട്ടു. നായിഡുവിന്‍റെ സന്ദർശനത്തിൽ പ്രതിഷേധിച്ച് ഭരണകക്ഷിയായ വൈഎസ്ആർ കോൺഗ്രസ് പാർട്ടി പ്രവർത്തകർ തെലുങ്കുദേശം പാർട്ടിയുടെ ബാനറുകൾ വലിച്ചുകീറുകയും റാലി നടത്തുകയും ചെയ്‌തതിനെ തുടർന്നാണ് സംഘർഷമുണ്ടായത്. ചന്ദ്രബാബു നായിഡുവിന്‍റെ വാഹനവ്യൂഹത്തിന് നേരെ വൈഎസ്ആർസിപി പ്രവർത്തകർ കല്ലെറിയുകയും ചെയ്‌തിരുന്നു.
അനുവാദമില്ലാതെ പട്ടണത്തിൽ പ്രവേശിച്ചതിന് ടിഡിപി പ്രവർത്തകരെ പൊലീസ് തടഞ്ഞതിനെ തുടർന്ന് തൊട്ടടുത്ത ചിറ്റൂർ ജില്ലയിലെ പുങ്ങനൂരിലും അക്രമം നടന്നിരുന്നു. കൂടാതെ പൊലീസിന് നേരെ കല്ലെറിയുകയും രണ്ട് വാഹനങ്ങൾക്ക് തീയിടുകയും ചെയ്‌തു. തുടർന്നുണ്ടായ അക്രമത്തിൽ 50ലധികം പൊലീസുകാർക്ക് പരിക്കേറ്റു. പുങ്ങനൂരിലെ അക്രമസംഭവങ്ങളിൽ ഇതുവരെ 70 ടിഡിപി പ്രവർത്തകർ അറസ്റ്റിലായിട്ടുണ്ട്.