75 വർഷത്തിന് ശേഷം സഹോദരങ്ങളുടെ സംഗമം ഗുർദാസ്‌പൂർ (പഞ്ചാബ്): ഏഴര പതിറ്റാണ്ടുകൾക്ക് ശേഷം സംഗമിക്കുന്ന സഹോദരങ്ങളുടെ ഒരു വീഡിയോയാണ് ഇന്ന് സമൂഹ മാധ്യമങ്ങളിലാകെ. 75 വർഷത്തിന് ശേഷം തന്‍റെ സഹോദരനെ കാണുന്ന 81 കാരിയായ മഹീന്ദർ കൗർ ആരുടെയും കണ്ണുനനയിക്കും.
1974ലെ വിഭജന സമയത്താണ് മഹീന്ദർ കൗർ തന്‍റെ ഇളയ സഹോദരനായ ഷെയ്ഖ് അബ്‌ദുല്ല അസീസില്‍ നിന്ന് വേർപിരിയുന്നത്. ഇപ്പോഴിതാ നീണ്ട 75 വർഷത്തിന് ശേഷം ഇരുവരും വീണ്ടും കണ്ടുമുട്ടിയിരിക്കുകയാണ്. പാകിസ്ഥാനിലെ പഞ്ചാബ് പ്രവിശ്യയിലെ ഗുരുദ്വാര ദർബാർ സാഹിബ് സന്ദർശിക്കാൻ ഇന്ത്യക്കാരെ അനുവദിക്കുന്ന കർതാർപൂർ ഇടനാഴിയോടാണ് ഈ സഹോദരങ്ങൾ നന്ദി പറയുന്നത്.
കുടുംബാംഗങ്ങൾക്കൊപ്പം ആണ് കർതാർപൂർ ഇടനാഴി വഴി ഗുരുദ്വാര സാഹിബിലേക്ക് മഹീന്ദർ കൗർ പോയത്. അതേസമയം തന്നെ സഹോദരൻ 78 കാരനായ ഷെയ്ഖ് അബ്‌ദുല്ല അസീസും പാക് അധീന കശ്‌മീരിൽ നിന്ന് കുടുംബത്തോടൊപ്പം കർതാർപൂർ സാഹിബില്‍ എത്തുകയായിരുന്നു. ഏഴര പതിറ്റാണ്ടുകൾക്ക് ശേഷമുള്ള സഹോദരങ്ങളുടെ അപൂർവ സംഗമം കർതാർപൂർ സാഹിബിൽ സന്നിഹിതരായവരെയും ഈറനണിയിച്ചു.
ഇരുവരുടെയും കുടുംബാംഗങ്ങളും ആഹ്ളാദത്തിൽ ഒത്തുചേർന്നു. അന്യോന്യം തിരിച്ചറിഞ്ഞതിന് പിന്നാലെ കൗറും അസീസും പരസ്‌പരം ആലിംഗനം ചെയ്യുന്നതും മാതാപിതാക്കളുടെ മരണത്തിൽ ദുഃഖം പ്രകടിപ്പിക്കുന്നതും വീഡിയോയില്‍ കാണാം.
1947ലെ ഇന്ത്യ-പാകിസ്ഥാൻ വിഭജനത്തിന് മുമ്പ് ഇരുവരും ഇന്ത്യയിൽ ആയിരുന്നു താമസിച്ചിരുന്നത്. വിഭജനത്തിന് ശേഷം അസീസ് പാകിസ്ഥാൻ അധിനിവേശ കശ്‌മീരിൽ സ്ഥിരതാമസമാക്കി. മുസ്‌ലിം മതവും സ്വീകരിച്ചു.
എന്നാല്‍ അദ്ദേഹത്തിന്‍റെ കുടുംബത്തിലെ ബാക്കിയുള്ളവർ ഇന്ത്യയിലെ പഞ്ചാബിലാണ് താമസിച്ചിരുന്നത്. താൻ ഇതുവരെ കുടുംബത്തിൽ നിന്ന് വേർപിരിഞ്ഞിരിക്കുകയായിരുന്നു എന്നും അവരെ കാണാൻ അതിയായി ആഗ്രഹിച്ചിരുന്നെന്നും അസീസ് പറഞ്ഞു. പലതവണ കുടുംബാംഗങ്ങളുമായി ബന്ധപ്പെടാൻ ശ്രമിച്ചെങ്കിലും വിജയിച്ചില്ലെന്നും അദ്ദേഹം പറയുന്നു.
അതേസമയം സഹോദരങ്ങളെ ഒന്നിപ്പിക്കുന്നതിൽ സോഷ്യൽ മീഡിയക്കും പ്രധാന പങ്കുണ്ട്. വിഭജന സമയത്ത് സഹോദരീ- സഹോദരങ്ങൾ വേർപിരിഞ്ഞതിനെക്കുറിച്ച് സോഷ്യൽ മീഡിയയിൽ ഒരു പോസ്റ്റ് പ്രത്യക്ഷപ്പെട്ടിരുന്നു. ഈ പോസ്റ്റാണ് രണ്ട് കുടുംബങ്ങളെയും പരസ്‌പരം ബന്ധിപ്പിക്കാൻ സഹായിച്ചത്.
കർതാർപൂർ ഭരണകൂടം ഇരുകുടുംബങ്ങളെയും ഹാരമണിയിക്കുകയും മധുരം നൽകുകയും ചെയ്‌തു. ദർബാർ സാഹിബ് കർതാർപൂർ സന്ദർശിച്ച ശേഷം ഒരുമിച്ച് ഭക്ഷണം കഴിച്ചും പരസ്‌പരം സമ്മാനങ്ങൾ നൽകിയുമാണ് രണ്ട് കുടുംബങ്ങളും മടങ്ങിയത്.
സിഖ് സ്ഥാപകൻ ഗുരു നാനാക്ക് ദേവിന്‍റെ അന്ത്യവിശ്രമ സ്ഥലമായ പാകിസ്ഥാനിലെ പഞ്ചാബ് പ്രവിശ്യയിലെ ഗുരുദ്വാര ദർബാർ സാഹിബിനെയും ഇന്ത്യയിലെ പഞ്ചാബ് സംസ്ഥാനത്തെ ഗുരുദാസ്‌പൂർ ജില്ലയിലെ ദേരാ ബാബ നാനാക്ക് ദേവാലയത്തെയും ബന്ധിപ്പിക്കുന്നതാണ് കർതാർപൂർ ഇടനാഴി. നാല് കിലോമീറ്റർ ദൈർഘ്യമുള്ള ഈ ഇടനാഴി ഇന്ത്യൻ സിഖ് തീർഥാടകർക്ക് ദർബാർ സാഹിബ് സന്ദർശിക്കാൻ വിസ രഹിത പ്രവേശനം നൽകുന്നു.
ALSO READ:'മരിക്കുന്നതിന് മുൻപ് ഷാരൂഖിനെ കാണണം' ; രോഗിയായ ആരാധികയുടെ ആഗ്രഹം നിറവേറ്റി കിംഗ് ഖാൻ
