അടിയന്തരാവസ്ഥ ഇന്ത്യൻ ജനാധിപത്യ ചരിത്രത്തിലെ ഇരുണ്ട അധ്യായം; രാജ്‌നാഥ് സിംഗ്

രാജ്യത്ത് അടിയന്തരാവസ്ഥ പ്രഖ്യാപിച്ചിട്ട് ഇന്നേക്ക് 46 വര്‍ഷം.

ന്യൂഡല്‍ഹി: 1975ല്‍ പ്രഖ്യാപിച്ച അടിയന്തരാവസ്ഥ ഇന്ത്യൻ ജനാധിപത്യ ചരിത്രത്തിലെ ഇരുണ്ട അധ്യായമെന്ന് കേന്ദ്ര പ്രതിരോധമന്ത്രി രാജ്‌നാഥ് സിംഗ്. ജനാധിപത്യ സംരക്ഷണത്തിന് വേണ്ടി പ്രവര്‍ത്തിച്ച എല്ലാവര്‍ക്കും അദ്ദേഹം അഭിവാദ്യം അര്‍പ്പിക്കുകയും ചെയ്തു.

രാജ്യത്തെ ജനാധിപത്യ പാരമ്പര്യങ്ങളെ ആക്രമിക്കാൻ ഭരണഘടന ദുരുപയോഗം ചെയ്ത രീതി ഒരിക്കലും മറക്കാനാവില്ലെന്നും കേന്ദ്രമന്ത്രി ട്വീറ്റ് ചെയ്തു. അടിയന്തരാവസ്ഥ പ്രഖ്യാപിച്ചതിന്‍റെ 46 വര്‍ഷം പൂര്‍ത്തിയാകുന്നതോടനുബന്ധിച്ച് നടത്തിയ പ്രസ്‌താവനയിലാണ് അദ്ദേഹം വിമര്‍ശനം ഉന്നയിച്ചത്.

ജനാധിപത്യ സംരക്ഷകര്‍ക്ക് അഭിവാദ്യം - രാജ്‌നാഥ് സിംഗ്

അടിയന്തരാവസ്ഥ കാലത്ത് ജനാധിപത്യ സംരക്ഷണത്തിനായി രാജ്യത്ത് ഒട്ടേറെ നീക്കങ്ങളും നടന്നിരുന്നു. അതിനായി ആളുകൾ നിരവധി പീഡനങ്ങൾ സഹിക്കുകയും ചെയ്‌തു. അവരുടെ പോരാട്ടങ്ങളും, ത്യാഗങ്ങളും ഇപ്പോഴും ഓര്‍മിക്കപ്പെടുകയും പ്രചോദനം നല്‍കുകയും ചെയ്യുന്നു. ജനാധിപത്യ സംരക്ഷണത്തില്‍ പങ്ക് വഹിച്ച എല്ലാവരെയും അഭിവാദ്യം ചെയ്യുന്നുവെന്നും രാജ്‌നാഥ് സിംഗ് ട്വീറ്റ് ചെയ്തു.

കോണ്‍ഗ്രസ് കുടുംബത്തിനെതിരായ ശബ്ദങ്ങളെ അടിച്ചമര്‍ത്താനാണ് രാജ്യത്ത് അടിയന്തരാവസ്ഥ ഏർപ്പെടുത്തിയതെന്ന് അമിത് ഷാ പറഞ്ഞു. സ്വതന്ത്ര ഇന്ത്യയുടെ ചരിത്രത്തിലെ ഇരുണ്ട അധ്യായമാണതെന്നും അദ്ദേഹം കൂട്ടിച്ചേര്‍ത്തു.

21 മാസം നീണ്ടുനിന്ന അടിയന്തരാവസ്ഥ

1975 ജൂണ്‍ 25 മുതല്‍ 1977 മാര്‍ച്ച് 21 വരെയുള്ള 21 മാസങ്ങളാണ് രാജ്യത്ത് അടിയന്തരാവസ്ഥ പ്രഖ്യാപിച്ചത്. ഇന്നേക്ക് 46 വര്‍ഷം മുമ്പാണ് അന്നത്തെ പ്രധാനമന്ത്രി ഇന്ദിരാഗാന്ധി പ്രസിഡന്‍റ് ഫക്രുദ്ദീന്‍ അലി അഹ്‌മദിനെക്കൊണ്ട് രാജ്യത്ത് അടിയന്തരാവസ്ഥ പ്രഖ്യാപിപ്പിക്കുന്നത്.

രാജ്യത്ത് നിലനിന്നിരുന്ന ആഭ്യന്തര കലാപാവസ്ഥയാണ് അടിയന്തരാവസ്ഥ പ്രഖ്യാപിക്കാൻ കാരണമായി ഇന്ദിര ചൂണ്ടിക്കാട്ടിയത്. ഇന്ത്യയിലെ സകല അധികാരങ്ങളും അതോടെ ഇന്ദിരാഗാന്ധി എന്ന ഒരൊറ്റ വ്യക്തിയില്‍ കേന്ദ്രീകൃതമായി.

തെരഞ്ഞെടുപ്പുകള്‍ റദ്ദാക്കപ്പെട്ടു. പൗരന്മാരുടെ അടിസ്ഥാനപരമായ മൗലികാവകാശങ്ങള്‍ ഒരു നിമിഷം കൊണ്ട് അസാധുവായി. ആറുമാസം കൂടുമ്പോള്‍ ഇന്ദിരാഗാന്ധിയുടെ നിര്‍ദ്ദേശപ്രകാരം പ്രസിഡന്‍റ് അടിയന്തരാവസ്ഥ നീട്ടി കൊണ്ടിരുന്നു.