ഹൈദരാബാദ് തെരഞ്ഞെടുപ്പ് വിജയത്തിൽ പ്രവർത്തകരെ അഭിനന്ദിച്ച് യെദ്യൂരപ്പ

പ്രധാനമന്ത്രി നരേന്ദ്ര മോദിയുടെ നേതൃത്വത്തിലുളള വികസന രാഷ്ട്രീയത്തിനുളള ജനങ്ങളുടെ വിശ്വാസം ഹൈദരാബാദിലെ ബിജെപിയുടെ വിജയം ഊട്ടിയുറപ്പിച്ചെന്ന് യെദ്യൂരപ്പ ട്വീറ്റ് ചെയ്തു

ന്യൂഡൽഹി: ഗ്രേറ്റർ ഹൈദരാബാദ് മുനിസിപ്പൽ കോർപറേഷൻ തെരഞ്ഞെടുപ്പിൽ ഗംഭീര പ്രകടനം കാഴ്ചവെച്ച തെലങ്കാന ബിജെപി പ്രവർത്തകരെ അഭിനന്ദിച്ച് കർണാടക മുഖ്യമന്ത്രി ബി എസ് യെദ്യൂരപ്പ.' പ്രധാനമന്ത്രി നരേന്ദ്ര മോദിയുടെ നേതൃത്വത്തിലുളള വികസന രാഷ്ട്രീയത്തിലുള്ള ജനങ്ങളുടെ വിശ്വാസം ഹൈദരാബാദിലെ ബിജെപിയുടെ വിജയം ഊട്ടിയുറപ്പിച്ചു . തെലങ്കാന ബിജെപിയുടെ എല്ലാ പ്രവർത്തകർക്കും ഈ മഹത്തായ നേട്ടത്തിന് ഹൃദ്യമായ അഭിനന്ദനങ്ങൾ.' ”യെദ്യൂരപ്പ ട്വീറ്റ് ചെയ്തു.

ജിഎച്ച്എംസി തെരഞ്ഞെടുപ്പിൽ ബിജെപി 48 സീറ്റുകൾ നേടി. ഭരണകക്ഷിയായ തെലങ്കാന രാഷ്ട്ര സമിതി 55 സീറ്റുകൾ നേടി. കഴിഞ്ഞ മാസം ഡബ്ബാക്ക് നിയമസഭാ സീറ്റിൽ ബിജെപി ശക്തമായ പ്രകടനം കാഴ്ചവച്ചു. ഭരണകക്ഷിയായ തെലങ്കാന രാഷ്ട്ര സമിതിയിൽ നിന്ന് പാർട്ടി സീറ്റ് പിടിച്ചെടുത്തിരുന്നു.

150 സീറ്റുകളിൽ 149 എണ്ണത്തിന്‍റെ ജിഎച്ച്എംസി ഫലം പ്രഖ്യാപിച്ചു. അസദുദ്ദീൻ ഒവൈസിയുടെ നേതൃത്വത്തിലുള്ള എ.ഐ.ഐ.എം 44 സീറ്റുകളും കോൺഗ്രസ് രണ്ട് സീറ്റുകളും നേടി.