ന്യൂഡല്‍ഹി: സാധാരണ റഫ്രിജറേറ്ററില്‍ സൂക്ഷിക്കാന്‍ കഴിയുന്ന വാക്‌സിനുകളാണ് രാജ്യത്തിന് നല്ലതെന്ന് മുതിര്‍ന്ന ആരോഗ്യ വിദഗ്‌ധ ഡോ സുനീല ഗാര്‍ഗ് വ്യക്തമാക്കി. ഡല്‍ഹിയിലെ മൗലാന ആസാദ് മെഡിക്കല്‍ കോളജിലെ കമ്മ്യൂണിറ്റി വിഭാഗം മേധാവിയും പ്രൊഫസറുമാണ് ഡോ സുനീല ഗാര്‍ഗ്.നിലവില്‍ കൊവിഡ് വാക്‌സിന്‍ സ്റ്റോറേജ് സംവിധാനങ്ങള്‍ക്കുള്ള ചര്‍ച്ചകള്‍ രാജ്യത്ത് പുരോഗമിച്ചുവരികയാണ്. ഇടിവി ഭാരതിന് നല്‍കിയ പ്രത്യേക അഭിമുഖത്തിലാണ് വാക്‌സിനുകള്‍ 2-8 ഡിഗ്രി സെല്‍ഷ്യസില്‍ സാധാരണ റഫ്രിജറേറ്ററുകളില്‍ സൂക്ഷിക്കുന്നതാണ് നല്ലതെന്ന അഭിപ്രായം ഉയര്‍ന്നു വന്നത്.
വ്യത്യസ്‌ത കമ്പനികള്‍ വികസിപ്പിച്ചെടുക്കുന്ന വാക്‌സിനുകള്‍ക്ക് വ്യത്യസ്‌ത സ്റ്റോറേജ് സംവിധാനമാണ് ഉള്ളത്. മോഡേര്‍ണയുടെ കൊവിഡ് വാക്‌സിന്‍ 2-8 ഡിഗ്രി സെല്‍ഷ്യസില്‍ സാധാരണ റഫ്രിജറേറ്ററുകളില്‍ സൂക്ഷിക്കാന്‍ കഴിയുമെന്നും സൈഡസ് കാഡിലയുടെയും മറ്റ് വാക്‌സിനുകളും സമാനമായ താപനിലയില്‍ സൂക്ഷിക്കാമെന്നും ഡോ സുനീല ഗാര്‍ഗ് വ്യക്തമാക്കി. എന്നാല്‍ ഫൈസറിന്‍റെ വാക്‌സിനുകള്‍ -80 ഡിഗ്രി താപനില ആവശ്യമാണ്. ഇത് രാജ്യത്തെ നിലവിലുള്ള കോള്‍ഡ് സ്റ്റോറേജ് സൗകര്യങ്ങള്‍ പ്രകാരം സാധിക്കില്ലെന്നും ഡോ ഗാര്‍ഗ് കൂട്ടിച്ചേര്‍ത്തു.