ന്യൂഡല്‍ഹി:വന്ദേ ഭാരത് മിഷന്‍റെ ഭാഗമായി വിദേശത്തുനിന്ന് സര്‍വീസ് നടത്തുന്ന വിമാനങ്ങളില്‍ അടുത്ത 10 ദിവസത്തേക്ക് മുഴുവന്‍ സീറ്റുകളിലും യാത്രക്കാരെ കൊണ്ടുവരാന്‍ എയര്‍ ഇന്ത്യക്ക് സുപ്രീംകോടതി അനുമതി നല്‍കി. 10 ദിവസത്തിന് ശേഷം മധ്യ സീറ്റുകൾ ഒഴിച്ചിടാൻ നിർദേശിച്ച ബോംബെ ഹൈക്കോടതിയുടെ ഉത്തരവ് പ്രകാരം പ്രവർത്തിക്കാൻ എയർലൈൻസിന് നിർദേശം നൽകി. ചീഫ് ജസ്റ്റിസ് എസ്‌.എ ബോബ്‌ഡെയുടെ നേതൃത്വത്തിലുള്ള ബെഞ്ചാണ് കേസ് പരിഗണിച്ചത്.
സാമൂഹ്യ അകലം പാലിക്കുന്നതിനായി നടുവിലെ സീറ്റ് ഒഴിച്ചിടണമെന്ന് മാർച്ച് 23 ഡിജിസിഎ പുറത്തിറക്കിയ മാര്‍ഗനിര്‍ദേശത്തില്‍ പറഞ്ഞിരുന്നു. എന്നാലിത് വന്ദേ ഭാരത് ദൗത്യത്തിലേര്‍പ്പെട്ട എയര്‍ ഇന്ത്യ വിമാനങ്ങള്‍ പാലിക്കുന്നില്ലെന്ന് ചൂണ്ടിക്കാട്ടി എയര്‍ ഇന്ത്യ പൈലറ്റ് മെയ് 22ന് ബോംബെ ഹൈക്കോടതിയെ സമീപിച്ചിരുന്നു. ഈ മാര്‍ഗനിര്‍ദേശം അസാധുവാണെന്ന് എയര്‍ ഇന്ത്യ കോടതിയെ അറിയിച്ചു. എന്നാല്‍ മുഴുവന്‍ സീറ്റും നല്‍കുന്നത് നിര്‍ത്തലാക്കണമെന്ന് ബോംബെ കോടതി ഇടക്കാല ഉത്തരവ് പുറപ്പെടുവിച്ചു. ഇതേതുടര്‍ന്നാണ് എയര്‍ ഇന്ത്യയും കേന്ദ്രസര്‍ക്കാരും സുപ്രീം കോടതിയെ സമീപിച്ചത്.