ഹൈദരാബാദ്: ആവര്‍ത്തിച്ചുണ്ടാകുന്ന വരള്‍ച്ചയും വെള്ളപ്പൊക്കവും അടക്കമുള്ള കെടുതികളെ നേരിടാൻ ദേശീയ നദീസംയോജന പദ്ധതി നടപ്പാക്കാന്‍ ഒരുങ്ങി കേന്ദ്ര സർക്കാര്‍. ഇതിനായി പ്രത്യേക അതോറിറ്റി രൂപീകരിക്കാൻ തീരുമാനിച്ച കേന്ദ്ര സർക്കാർ ജല പദ്ധതികളുടെ പുരോഗതി ചർച്ച ചെയ്യുന്നതിനായി യോഗം വിളിച്ചിട്ടുണ്ട്. നേരത്തെ നദീസംയോജന പ്രോജക്ടുകൾക്ക് 60:40 ധനസഹായം ലഭിച്ചിരുന്നു. അതായത് 60 ശതമാനം കേന്ദ്ര സർക്കാരും 40 ശതമാനം സംസ്ഥാന സർക്കാരുകളും വിഹിതം വഹിച്ചിരുന്നു. നിലവിൽ, ധനസഹായം 90:10 അടിസ്ഥാനമാക്കി മാറ്റിയിട്ടുണ്ട്. ഇത് അന്തർസംസ്ഥാന പദ്ധതികൾക്ക് മാത്രമല്ല, ഒരേ സംസ്ഥാനത്ത് രണ്ട് നദികളെ പരസ്പരം ബന്ധിപ്പിക്കുന്നതിനും ബാധകം ആണ്. പ്രത്യേക അതോറിറ്റി സൃഷ്ടിക്കുന്നത് അന്താരാഷ്ട്ര ധനകാര്യ സ്ഥാപനങ്ങളിൽ നിന്നും ബാങ്കുകളിൽ നിന്നും ധനസഹായം ലഭിക്കുന്നതിന് സഹായകമാകുമെന്നും കേന്ദ്ര സര്‍ക്കാർ വിശദീകരിക്കുന്നു.
ദേശീയ ജല വികസന ഏജൻസിക്കാണ് (എൻ‌ഡബ്ല്യുഡി‌എ) നദീസംയോജന പദ്ധതിയുടെ മേൽനോട്ടം. വിദഗ്ധരുമായി സംവദിച്ച് പ്രത്യേക കമ്മിറ്റികൾ രൂപീകരിക്കുക, സമഗ്ര പ്രൊജക്ട് റിപ്പോർട്ടുകൾ തയ്യാറാക്കുക, സംസ്ഥാനങ്ങളുമായി കൂടിയാലോചിക്കുക, ആവശ്യമായ അംഗീകാരങ്ങൾ നേടുക തുടങ്ങി പദ്ധതിയുടെ എല്ലാ വശങ്ങളും എൻ‌ഡബ്ല്യുഡി‌എ നിരീക്ഷിക്കും. ധനസമാഹരണത്തിന്‍റെ വലിപ്പവും പ്രാധാന്യവും കണക്കിലെടുത്ത് നാഷണൽ ഇന്‍റർലിങ്കിംഗ് ഓഫ് റിവേഴ്‌സ് അതോറിറ്റി (എന്‍‌ഐ‌ആര്‍‌എ) സ്ഥാപിക്കാൻ ജൽ ശക്തി മന്ത്രാലയം തീരുമാനിക്കുകയും, 2019 ഒക്ടോബറിൽ എൻ‌ഡബ്ല്യുഡി‌എ ഇത് സംബന്ധിച്ച കരട് ബിൽ ജൽ ശക്തി മന്ത്രാലയത്തിന് അയക്കുകയും ചെയ്തിരുന്നു. ഇതുമായി ബന്ധപ്പെട്ടുള്ള അന്തിമ റിപ്പോര്‍ട്ടിന് കേന്ദ്ര മന്ത്രിസഭ അനുമതി നൽകിയാൽ അതോറിറ്റി നിലവില്‍ വരുമെന്നും ഉദ്യോഗസ്ഥർ പറയുന്നു.