എംപിമാരുടെ സസ്‌പെൻഷൻ പിൻവലിക്കണമെന്ന ആവശ്യവുമായി പ്രതിപക്ഷത്തിന്‍റെ അനിശ്ചിതകാല പ്രതിഷേധം

പ്രതിപക്ഷപാർട്ടി നേതാക്കൾ കേന്ദ്ര സർക്കാരിന്‍റെ നടപടി ദൗർഭാഗ്യകരവും സ്വേച്ഛാധിപത്യ മനോഭാവം വ്യക്തമാക്കുന്നതാണെന്നും പ്രതികരിച്ചു.

ന്യൂഡൽഹി: എംപിമാരുടെ സസ്‌പെൻഷൻ പിൻവലിക്കണമെന്ന് ആവശ്യപ്പെട്ട് പാർലമെന്‍റിന് പുറത്ത് അനിശ്ചിതകാല പ്രതിഷേധം. കഴിഞ്ഞ ദിവസം കാർഷിക ബില്ല് അവതരണത്തിനിടെ രാജ്യസഭയിൽ ഉപാധ്യക്ഷനെ അപമാനിച്ചതിനെതിരെയാണ് എട്ട് എംപിമാർക്കെതിരെ നടപടിയെടുത്തത്. തൃണമൂൽ കോൺഗ്രസ് (ടിഎംസി) എംപിമാരായ ഡെറിക് ഒബ്രിയാൻ, ഡോള സെൻ, ആം ആദ്‌മി പാർട്ടി നേതാവ് സഞ്ജയ് സിംഗ്, കോൺഗ്രസ് പ്രതിനിധികളായ രാജു സാതവ്, രിപുൺ ബോറ, സയിദ് നാസിർ ഹുസൈൻ, സിപിഎം എംപിമാരായ കെ.കെ രാഗേഷ്, എളമരം കരീം എന്നിവരെയാണ് നിലവിലെ സഭാ സമ്മേളന കാലാവധി തീരുന്നത് വരെ പുറത്താക്കിയത്.

പ്രതിപക്ഷ പാർട്ടി നേതാക്കൾ കേന്ദ്ര സർക്കാരിന്‍റെ നടപടിയെ രൂക്ഷമായി വിമർശിച്ചു. കേന്ദ്രസർക്കാരിന്‍റെ സ്വേച്ഛാധിപത്യ മനോഭാവത്തെ ദൗർഭാഗ്യകരമെന്നാണ് ബംഗാൾ മുഖ്യമന്ത്രി മമതാ ബാനർജി പ്രതികരിച്ചത്. "കർഷകരുടെ താൽപ്പര്യങ്ങൾ സംരക്ഷിക്കാൻ പോരാടിയ എട്ട് എംപിമാരെ സസ്പെൻഡ് ചെയ്തത് നിർഭാഗ്യകരവും ജനാധിപത്യ മാനദണ്ഡങ്ങളെയും തത്വങ്ങളെയും മാനിക്കാത്ത സ്വേച്ഛാധിപത്യ ഗവൺമെന്‍റിന്‍റെ പ്രതിഫലനവുമാണ്. ഞങ്ങൾ കീഴടങ്ങില്ല, ഫാസിസ്റ്റ് സർക്കാരിനെതിരെ പാർലമെന്‍റിലും തെരുവുകളിലും ഞങ്ങൾ പോരാടും," മമതാ ബാനർജി ട്വീറ്റ് ചെയ്‌തു.

രാജ്യസഭ അംഗങ്ങളെ പുറത്താക്കിയത് ജനാധിപത്യവിരുദ്ധമാണെന്നും അവരുടെ സസ്‌പെൻഷൻ പിൻവലിക്കാനായി പ്രതിഷേധിക്കുമെന്നും കോൺഗ്രസ് എംപി അധിർ രഞ്ജൻ ചൗധരി പറഞ്ഞു.

"സസ്പെൻഷൻ ഞങ്ങളെ നിശബ്ദരാക്കില്ല. കർഷകരുടെ പോരാട്ടത്തിനൊപ്പം ഞങ്ങൾ നിലകൊള്ളും. ഡെപ്യൂട്ടി ചെയർമാൻ പാർലമെന്‍ററി നടപടിക്രമങ്ങൾ തകർക്കുകയായിരുന്നു. എംപിമാരുടെ സസ്പെൻഷൻ ബിജെപിയുടെ ഭീരുത്വ മുഖം തുറന്നുകാട്ടുന്നതാണ്. ജനാധിപത്യവിരുദ്ധ പ്രവർത്തനങ്ങളിൽ നിന്ന് ശ്രദ്ധ തിരിക്കാനുള്ള ശ്രമമായി മാത്രമേ ജനങ്ങൾ ഇതിനെ കാണുകയുള്ളു," എന്ന് എളമരം കരീം എംപിയും വ്യക്തമാക്കി.

"സഞ്ജയ് സിംഗ് കറുത്ത നിയമത്തിനെതിരെ പ്രതിഷേധിച്ചു. രാജ്യത്തെ കോടിക്കണക്കിന് കർഷകരോട് ഈ കറുത്ത നിയമത്തെ എതിർക്കാൻ ആവശ്യപ്പെടുന്നു. പാർലമെന്‍റിനുള്ളിൽ ഇതിനെതിരെ ഞങ്ങൾ പ്രതികരിക്കുമെന്നും പുറത്ത് കർഷകർ പ്രതിഷേധം നടത്താനും ആം ആദ്‌മി പാർട്ടി അറിയിച്ചു. അതേ സമയം, രാജ്യസഭയിൽ നടന്ന പ്രതിപക്ഷപ്രതിഷേധത്തെ ഗുണ്ടായിസമെന്നാണ് പാര്‍ലമെന്‍ററി കാര്യമന്ത്രി പ്രഹ്ളാദ് ജോഷി അഭിപ്രായപ്പെട്ടത്.