ഉത്തർപ്രദേശിൽ പതിനാറ് വയസുകാരിയെ പീഡിപ്പിച്ച് ഗർഭിണിയാക്കി; മൂന്നുപേർ അറസ്റ്റിൽ

കുട്ടിയുടെ ആരോഗ്യ സ്ഥിതി മോശമായതിനെ തുടർന്ന് ആശുപത്രിയിലെത്തിച്ചപ്പോഴാണ് ഗർഭിണിയാണെന്ന വിവരം കുടുംബം അറിയുന്നത്.

ലഖ്‌നൗ: ഉത്തർപ്രദേശിലെ ബുലന്ദ്‌ഷഹർ ജില്ലയിൽ പതിനാറ് വയസുകാരിയെ പീഡിപ്പിച്ച് ഗർഭിണിയാക്കിയതായി പരാതി. ഗർഭിണിയാണെന്ന് അറിഞ്ഞതിനെ തുടർന്നാണ് കുട്ടി പൊലീസിൽ പരാതി രജിസ്റ്റർ ചെയ്‌തത്. ഒന്നര വർഷത്തിനിടെ മൂന്നുപേർ ചേർന്ന് പലതവണ തന്നെ കൂട്ട ബലാത്സഗത്തിന് ഇരയാക്കിയെന്ന് കുട്ടി പരാതിയിൽ പറയുന്നു.

വനിതാ സർക്കിൾ ഉദ്യോഗസ്ഥയുടെ നേതൃത്വത്തിലുള്ള സംഘം പെൺകുട്ടിയുടെ വീട്ടിലെത്തി മൊഴി രേഖപ്പെടുത്തുകയും എഫ്‌ഐആർ രജിസ്റ്റർ ചെയ്യുകയും ചെയതു. കേസുമായി ബന്ധപ്പെട്ട് 72 വയസുകാരനുൾപ്പെടെ മൂന്ന് പേരെ പൊലീസ് അറസ്റ്റ് ചെയ്‌തു.

കുട്ടിയുടെ ആരോഗ്യ സ്ഥിതി മോശമായതിനെതുടർന്ന് ആശുപത്രിയിലെത്തിച്ചപ്പോഴാണ് ഗർഭിണിയാണെന്ന വിവരം കുടുംബം അറിയുന്നതെന്ന് ബുലന്ദ്‌ഷഹർ സീനിയർ പൊലീസ് സൂപ്രണ്ട് സന്തോഷ് കുമാർ പറഞ്ഞു. ശ്രീചന്ദ് (72), ബൽവീർ (52), മഹേഷ് എന്നിവരെയാണ് അറസ്റ്റ് ചെയ്‌തതെന്നും അദ്ദേഹം കൂട്ടിചേർത്തു.

ബൽ‌വീർ കുട്ടിയുടെ കുടുംബത്തിന് 1.5 ലക്ഷം രൂപ വായ്‌പ നൽകിയതായും പണം തിരികെ ചോദിച്ചപ്പോൾ ഇരുകൂട്ടരും തമ്മിൽ തർക്കമുണ്ടായതായും കേസിൽ അന്വേഷണം പുരോഗമിക്കുകയാണെന്നും പൊലീസ് പറഞ്ഞു.