ഭരണഘടനാ വിരുദ്ധമായ തെരഞ്ഞെടുപ്പ് ചിഹ്നങ്ങൾ ഒഴിവാക്കണം: അണ്ണാ ഹസാരെ

സാമൂഹ്യപ്രവർത്തകന്‍ അണ്ണാ ഹസാരെയുടെ പ്രതികരണം ഇടിവി ഭാരത്തിന് അനുവദിച്ച പ്രത്യേക അഭിമുഖത്തില്‍. തെരഞ്ഞെടുപ്പ് നടപടി ക്രമങ്ങളില്‍ വലിയതോതിലുള്ള മാറ്റം വരുത്തണമെന്നും അദ്ദേഹം.

ന്യൂഡല്‍ഹി:തെരഞ്ഞെടുപ്പ് നടപടി ക്രമങ്ങളില്‍ വലിയതോതിലുള്ള മാറ്റം വരുത്തണമെന്ന് സാമൂഹ്യ പ്രവർത്തകന്‍ അണ്ണാ ഹസാരെ. ഇടിവി ഭാരത്തിന് അനുവദിച്ച പ്രത്യേക അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്. രാഷ്ട്രീയ പാർട്ടികളുടെ ഭരണഘടനാ വിരുദ്ധമായ തെരഞ്ഞെടുപ്പ് ചിഹ്നങ്ങൾ ഒഴിവാക്കണമെന്നും അദ്ദേഹം പറഞ്ഞു.

ഇതുസംബന്ധിച്ച് ജനങ്ങളില്‍ അവബോധം വളർത്താനുള്ള ശ്രമത്തിലാണ് താനെന്നും അദ്ദേഹം പറഞ്ഞു. ഇന്ന് രാഷ്ട്രീയ പാർട്ടികൾ തെരഞ്ഞെടുപ്പില്‍ മത്സരിക്കുന്നത് മുന്നണികളായിട്ടാണ്. എന്നാല്‍ ഇന്ത്യന്‍ ഭരണഘടനയില്‍ ഇത്തരത്തിലുള്ള മുന്നണികളെ കുറിച്ച് പരാമർശമില്ലെന്നും അദ്ദേഹം പറഞ്ഞു. തെരഞ്ഞെടുപ്പ് വിജയം ലക്ഷ്യമിട്ട് രൂപീകരിക്കുന്ന മുന്നണികളാണ് രാജ്യത്തെ പല പ്രശ്നങ്ങൾക്കും കാരണമെന്നും അദ്ദേഹം ചൂണ്ടിക്കാട്ടി. താന്‍ രാജ്യത്തെ ഭരണഘടനയിലാണ് വിശ്വസിക്കുന്നതെന്നും എന്നാല്‍ ഭരണഘടനയില്‍ തെരഞ്ഞെടുപ്പ് ചിഹ്നങ്ങളെ കുറിച്ചോ രാഷ്ട്രീയ പാർട്ടികളെ കുറിച്ചോ പരാമർശമില്ലെന്നും അദ്ദേഹം വ്യക്തമാക്കി.