റിയാദ്:സൗദി സന്ദര്‍ശനത്തിനായി പ്രധാനമന്ത്രി നരേന്ദ്ര മോദി റിയാദിലെത്തി. കിങ് ഖാലിദ് അന്താരാഷ്ട്ര വിമാനത്താവളത്തിലെത്തിയ പ്രധാനമന്ത്രിയെ ഗാർഡ് ഓഫ് ഹോണര്‍ നല്‍കി സ്വീകരിച്ചു. ഇന്ത്യയും സൗദിയും തമ്മിലുള്ള ഉഭയകക്ഷി ബന്ധങ്ങള്‍ മെച്ചപ്പെടുത്തുന്നതിന്‍റെ ഭാഗമായാണ് പ്രധാനമന്ത്രിയുടെ സൗദി സന്ദർശനം.
മൂല്യവത്തായ ഒരു സുഹൃത്തിനോടുള്ള ബന്ധം ശക്തിപ്പെടുത്തുന്നതിനുവേണ്ടിയുള്ള സന്ദർശനമാണിത്. നിരവധി തന്ത്രപ്രധാനമായ പരിപാടികളില്‍ പങ്കെടുക്കാനുണ്ടെന്ന് സൗദിയിലെത്തിയ പ്രധാനമന്ത്രി ട്വീറ്റ് ചെയ്തു. രണ്ട് ദിവസത്തെ സന്ദര്‍ശനത്തിനായാണ് മോദി എത്തിയത്. വിവിധ മേഖലയിലുള്ള ഉന്നത ഉദ്യോഗസ്ഥരുമായും അധികൃതരുമായും കൂടിക്കാഴ്ച നടത്തിയതിന് ശേഷം വിവിധ കരാറുകളിലും ഒപ്പുവെക്കും. വൈകുന്നേരം അ‍ഞ്ചരക്ക് റിയാദില്‍ നടക്കുന്ന ആഗോള നിക്ഷേപ സമ്മേളനത്തില്‍ പ്രധാനമന്ത്രി സംസാരിക്കും.