പൗരത്വ ഭേദഗതി നിയമത്തിനെതിരെ പ്രതിഷേധം; പോപ്പുലര്‍ ഫ്രണ്ട് അംഗങ്ങൾക്ക് ജാമ്യം

ഉത്തര്‍പ്രദേശ് പൊലീസ് തെളിവുകൾ നല്‍കുന്നതില്‍ പരാജയപ്പെട്ടതിനെ തുടര്‍ന്നാണ് പോപ്പുലര്‍ ഫ്രണ്ട് ഓഫ് ഇന്ത്യ പ്രസിഡന്‍റ് വസീം അഹമ്മദ് ഉള്‍പ്പടെയുള്ളവരെ ജാമ്യം നല്‍കി വിട്ടയച്ചത്

ലക്‌നൗ: പൗരത്വ ഭേദഗതി നിയമത്തിനെതിരെയുള്ള പ്രതിഷേധങ്ങൾക്കിടെയുണ്ടായ അക്രമങ്ങളുടെ സൂത്രധാരനെന്ന് ആരോപിക്കപ്പെടുന്ന പോപ്പുലര്‍ ഫ്രണ്ട് ഓഫ് ഇന്ത്യ പ്രസിഡന്‍റ് വസീം അഹ്മദുൾപ്പെടെയുള്ളവര്‍ക്ക് ജാമ്യം ലഭിച്ചു. ഉത്തര്‍പ്രദേശ് പൊലീസ് തെളിവുകൾ നല്‍കുന്നതില്‍ പരാജയപ്പെട്ടതിനെ തുടര്‍ന്നാണ് ഇവരെ ജാമ്യം നല്‍കി വിട്ടയച്ചത്.

സര്‍ക്കാര്‍ സംഘടനയെ അപകീര്‍ത്തിപ്പെടുത്താന്‍ ശ്രമിക്കുകയാണെന്നും എന്നാല്‍ വ്യക്തമായ തെളിവുകളില്ലാത്തതിനെ തുടര്‍ന്ന് 25 പിഎഫ്ഐ അംഗങ്ങളില്‍ 19 പേര്‍ക്കും ജാമ്യം ലഭിച്ചുവെന്നും വസീം അഹ്മദ് മാധ്യമങ്ങളോട് പ്രതികരിച്ചു. ഡിസംബര്‍ 23നായിരുന്നു വസീം അഹ്മദ്, ട്രഷറര്‍ നദീം അലി, ഡിവിഷണൽ പ്രസിഡന്‍റ് അഷ്‌ഫാക്ക് എന്നിവരെ ലക്‌നൗ പൊലീസ് അറസ്റ്റ് ചെയ്‌തത്. പ്രകോപനപരമായ പോസ്റ്ററുകൾ, സിഡികൾ, ബാനറുകൾ എന്നിവ സൂക്ഷിച്ചുവെന്നതായിരുന്നു ഇവർക്കെതിരെ ഉയര്‍ന്ന ആരോപണം. നദീം അലിയുടെയും അഷ്‌ഫാക്കിന്‍റെയും ജാമ്യാപേക്ഷ അടുത്തയാഴ്‌ച പരിഗണിക്കും.

വസീം അഹ്മദിന് ജാമ്യം ലഭിച്ചിട്ടുണ്ടെങ്കിലും ഇപ്പോഴും തെളിവുകൾ ശേഖരിക്കുകയാണ്. അദ്ദേഹത്തിന്‍റെ പങ്ക് സംബന്ധിച്ച് ഇതിനകം തെളിവുകൾ ലഭിച്ചിട്ടുണ്ടെന്നും അത് കോടതിയിൽ സമർപ്പിക്കുമെന്നും ഹസ്രാത്ഗഞ്ച് എസ്എച്ച്ഒ ധീരേന്ദ്ര ഖുശ്വാഹ അറിയിച്ചു. ഇവര്‍ക്കെതിരെ ഇതുവരെ കുറ്റപത്രം സമർപ്പിച്ചിട്ടില്ലെന്നും അദ്ദേഹം കൂട്ടിച്ചേര്‍ത്തു.

രാജ്യവിരുദ്ധ പ്രവര്‍ത്തനങ്ങളില്‍ പങ്കെടുത്തുവെന്നാരോപിച്ച് പോപ്പുലര്‍ ഫ്രണ്ട് ഓഫ് ഇന്ത്യ എന്ന സംഘടനയെ നിരോധിക്കണമെന്ന നിര്‍ദേശം ഉത്തര്‍പ്രദേശ് സര്‍ക്കാര്‍ നേരത്തെ മുന്നോട്ടുവെച്ചിരുന്നു. നിരോധിത സംഘടനയായ സ്റ്റുഡന്‍റ്‌സ് ഇസ്ലാമിക് മൂവ്‌മെന്‍റ് ഓഫ് ഇന്ത്യയുടെ പുതിയ രൂപമാണ് പോപ്പുലര്‍ ഫ്രണ്ട് ഓഫ് ഇന്ത്യ എന്നാണ് സംസ്ഥാന സർക്കാരിന്‍റെ വാദം.