വിരമിക്കാൻ അനുവദിക്കണമെന്ന്​ ആവശ്യപ്പെട്ട് എയർ ഇന്ത്യ പൈലറ്റുമാർ

മുടങ്ങി കിടക്കുന്ന ശമ്പളം സമയബന്ധിതമായി നൽകണമെന്നും നോട്ടീസ്​ പിരീഡില്ലാതെ വിരമിക്കാൻ അനുവദിക്കണമെന്നുമാണ്​ പൈലറ്റുമാരുടെ പ്രധാന ആവശ്യം.

ന്യൂഡല്‍ഹി:സ്വകാര്യവൽക്കരണം സംബന്ധിച്ച്​ ആശങ്കകൾ നില നിൽക്കുന്നതിനിടെ ശമ്പള കുടിശ്ശിക തന്ന് തീർക്കണമെന്ന്​ ആവശ്യപ്പെട്ട്​ എയർ ഇന്ത്യ പൈലറ്റുമാരുടെ യൂണിയൻ വ്യോമയാനമന്ത്രിക്ക്​ കത്തയച്ചു. മുടങ്ങി കിടക്കുന്ന ശമ്പളം സമയബന്ധിതമായി നൽകണമെന്നും നോട്ടീസ്​ കാലയളവില്ലാതെ വിരമിക്കാൻ അനുവദിക്കണമെന്നുമാണ്​ പൈലറ്റുമാരുടെ ആവശ്യം

സ്വകാര്യവൽക്കരണമല്ലാതെയൊരു പ്ലാൻ ബി കമ്പനിക്ക്​ ഇല്ലാത്തിടത്തോളം ശമ്പളകുടിശ്ശിക തന്നു തീർത്ത്​ നോട്ടീസില്ലാതെ വിരമിക്കാൻ അനുവദിക്കണമെന്ന്​ പൈലറ്റുമാർ വ്യോമയാനമന്ത്രി എച്ച്​.പുരിക്ക്​ അയച്ച കത്തിൽ ചൂണ്ടിക്കാട്ടുന്നു. എയർലൈനിന്‍റെ ഭാവി സംബന്ധിച്ച അനിശ്ചിതത്വത്തിനിടയിൽ പ്രവർത്തിക്കാൻ തങ്ങൾക്ക് സാധിക്കില്ലെന്നും ഇന്ത്യൻ കൊമേഴ്‌സ്യൽ പൈലറ്റ്സ് അസോസിയേഷന്‍ പറയുന്നുണ്ട്. മാർച്ച്​ 31, 2020ന്​ മുമ്പ്​ എയർ ഇന്ത്യയുടെ സ്വകാര്യവൽക്കരണം നടന്നില്ലെങ്കിൽ അടച്ചുപൂട്ടുമെന്ന പ്രസ്​താവന ആശങ്കപ്പെടുത്തുന്നതാണെന്നും കത്തില്‍ പറയുന്നുണ്ട്.