സ്കൂളില്‍ നാടകം: ബിന്ദറില്‍ അറസ്റ്റിലായവരെ സന്ദര്‍ശിച്ചതായി ഒവൈസി

കര്‍ണ്ണാടകയിലെ ബിന്ദറിലെ സ്കൂളിലെ ആറാം ക്ലാസുകാരിയുടെ മാതാവിനെയും സ്കൂളിലെ പ്രധാന അധ്യപിക ഫരീദയേയുമായിരുന്നു പൊലീസ് അറസ്റ്റ് ചെയ്തത്. ജനുവരി 21നാണ് ഇരുവരെയും പൊലീസ് അറസ്റ്റ് ചെയ്തത്.

ഹൈദരാബാദ്: സി.എ.എ - എന്‍.ആര്‍.സി വിരുദ്ധ നാടകം അവതരിപ്പിച്ച വിദ്യാര്‍ഥിയുടെ മാതാവ് നജ്മുന്നീസയെ എ.ഐ.എം.ഐ.എം നേതാവ് അസദുദ്ദീന്‍ ഒവൈസി സന്ദര്‍ശിച്ചു. കര്‍ണ്ണാടകയിലെ ബിന്ദറില്‍ ആറാം ക്ലാസുകാരിയുടെ മാതാവിനെയും സ്കൂളിലെ പ്രധാന അധ്യപിക ഫരീദയേയുമായിരുന്നു പൊലീസ് അറസ്റ്റ് ചെയ്തത്. ജനുവരി 21നാണ് ഇരുവരെയും പൊലീസ് അറസ്റ്റ് ചെയ്തത്. സ്കൂള്‍ വാര്‍ഷികത്തിന്‍റെ ഭാഗമായി അവതരിപ്പിച്ച നാടകം പൗരത്വ നിയമ വിരുദ്ധമാണെന്നും പ്രധാനമന്ത്രിയെ അപകീര്‍ത്തിപ്പെടുത്തുന്നതാണെന്നും കാണിച്ചായിരുന്നു അറസ്റ്റ്. നാടകത്തിന് അനുമതി നല്‍കിയ സ്കൂള്‍ മാനേജ്മെന്‍റിനെതിരെയും കേസ് രജിസ്റ്റര്‍ ചെയ്തിട്ടുണ്ട്. രണ്ടുപേരാണ് ഈ കേസുമായി ബന്ധപ്പെട്ട് അറസ്റ്റിലായത്. ആറ് കുട്ടികളാണ് നാടകത്തില്‍ അഭിനയിച്ചത്. കുട്ടികളെ മാതാപിതാക്കളുടെ സാന്നിധ്യത്തില്‍ പൊലീസ് ചോദ്യം ചെയ്തിരുന്നു.

വിധവയായ നജ്മുന്നീസയുടെ മകള്‍ ഇപ്പോള്‍ തനിച്ചാണ് താമസിക്കുന്നത്. പ്രധാനധ്യാപിക ഫരീദക്ക് അസുഖമായതിനാല്‍ വൈദ്യ പരിശോധന നല്‍കേണ്ടി വന്നു എന്നും ഇരുവരേയും സന്ദര്‍ശിച്ച ശേഷം ഒവൈസി ട്വീറ്റ് ചെയ്തു. തന്‍റെയും പാര്‍ട്ടിയുടെയും എല്ലാവിധ പിന്‍തുണയും ഇവര്‍ക്ക് നല്‍കും. ബിന്ദറിലെ പൊലീസ് സൂപ്രണ്ടിനേയും ഒവൈസി സന്ദര്‍ശിച്ചു. അറസ്റ്റില്‍ ശക്തമായ വിയോജിപ്പ് അദ്ദേഹത്തെ അറിയിച്ചതായും ഒവൈസി ട്വീറ്റ് ചെ്യതു. ഒരു സ്കൂളില്‍ കളിച്ച നാടകം എങ്ങനെ കുറ്റകൃത്യമാകുമെന്ന് അദ്ദേഹം ചോദിച്ചു. മാത്രമല്ല കൃത്യമായ അന്വേഷണം നടത്താതെ എന്തിനാണ് കുട്ടിയുടെ മാതാവിനെ അറസ്റ്റ് ചെ്യതെന്ന് താന്‍ പൊലീസിനോട് ചോദിച്ചതായും ഒവൈസി ട്വീറ്റില്‍ കുറിച്ചു.