സംസ്ഥാന സര്‍ക്കാര്‍ ഭരണഘടനാ മൂല്യം ഉയര്‍ത്തി പിടിച്ചു: ആന്ധ്രാപ്രദേശ് മുഖ്യമന്ത്രി

വൈ‌.എസ്.ആർ കോൺഗ്രസ് തിരഞ്ഞെടുപ്പ് പ്രചാരണ വേളയിൽ നൽകിയ 129 വാഗ്ദാനങ്ങളിൽ 83 എണ്ണവും 14 മാസക്കാലയളവിൽ പൂർത്തീകരിച്ചതായും ആന്ധ്രാപ്രദേശ് മുഖ്യമന്ത്രി വൈ.എസ്. ജഗൻമോഹൻ റെഡ്ഡി പറഞ്ഞു.

അമരാവതി: 14 മാസത്തെ വൈ‌.എസ്.ആർ കോൺഗ്രസ് ഭരണം ഇന്ത്യൻ ഭരണഘടനയുടെ എല്ലാ മൂല്യങ്ങളും ഉയർത്തിപ്പിടിച്ചതായി ആന്ധ്രാപ്രദേശ് മുഖ്യമന്ത്രി വൈ.എസ്. ജഗൻമോഹൻ റെഡ്ഡി. ഇന്ത്യൻ ഭരണഘടനയുടെ ആദ്യ പേജിൽ പരാമർശിക്കുന്ന നീതി, സ്വാതന്ത്ര്യം, സമത്വം, സാഹോദര്യം എന്നിവ പിന്തുടർന്നാണ് ഇപ്പോഴത്തെ സംസ്ഥാന ഗവൺമെന്‍റ് ഭരണം നടപ്പിലാക്കുന്നതെന്നും ജഗൻമോഹൻ റെഡ്ഡി വ്യക്തമാക്കി. 74-ാം സ്വാതന്ത്ര്യദിനത്തിന്‍റെ ഭാഗമായി വിജയവാഡയിലെ ഇന്ദിരാഗാന്ധി മുനിസിപ്പൽ സ്റ്റേഡിയത്തിൽ നടന്ന ചടങ്ങിനെ അഭിസംബോധന ചെയ്‌ത് സംസാരിക്കുകയായിരുന്നു അദ്ദേഹം.

വൈ‌.എസ്.ആർ കോൺഗ്രസ് തിരഞ്ഞെടുപ്പ് പ്രചാരണ വേളയിൽ നൽകിയ നവ രത്നങ്ങൾ എന്ന വാഗ്ദാനം നടപ്പിലാക്കികൊണ്ടിരിക്കുകയാണെന്നും ജഗൻമോഹൻ റെഡ്ഡി പറഞ്ഞു. കർഷകർക്കും സ്‌ത്രീകൾക്കും ക്ഷേമപദ്ധതികൾ, പട്ടികജാതി, പട്ടികവർഗ വിഭാഗത്തിൽപെടുന്നവർക്കും മുന്നാക്ക വിഭാഗത്തിലെ നിർധനരായവരുടെയും ഉന്നമനങ്ങൾക്കായി വിവിധ പദ്ധതികൾ നടപ്പിലാക്കി. വിദ്യാഭ്യാസരംഗത്ത് അടിസ്ഥാന സൗകര്യങ്ങൾ മെച്ചപ്പെടുത്തി. പാഠപുസ്‌തകങ്ങളും മറ്റും സൗജന്യമാക്കി. സംസ്ഥാനത്തെ സ്വകാര്യ വിദ്യാഭ്യാസം നിയന്ത്രിക്കുന്നതിനായി രണ്ട് കമ്മിഷനുകൾ രൂപീകരിച്ചതായും മുഖ്യമന്ത്രി വ്യക്തമാക്കി.

ആന്ധ്രാപ്രദേശിലെ കൊവിഡ് സാഹചര്യങ്ങളെക്കുറിച്ചും വൈ.എസ്. ജഗൻമോഹൻ റെഡ്ഡി വിശദീകരിച്ചു. രാജ്യത്ത് തന്നെ ഏറ്റവുമധികം കൊവിഡ് പരിശോധനകൾ നടത്തുന്ന സംസ്ഥാനമാണ് ആന്ധ്രാപ്രദേശ്. കൊവിഡ് ബാധിതർക്കായി 1,088 പുതിയ ആംബുലൻസുകളും 5,000 രൂപ സഹായവും നൽകിയിട്ടുണ്ട്. 2019 വരെ ആന്ധ്രയിൽ 11 മെഡിക്കൽ കോളജുകൾ മാത്രമേ ഉണ്ടായിരുന്നുള്ളൂ. 14 മാസത്തിനുള്ളിൽ ഇത് 16 മെഡിക്കൽ കോളജുകളിലേക്ക് എത്തിക്കാൻ നിശ്ചയിച്ചിട്ടുണ്ട്. നിലവിലുള്ള എല്ലാ ആശുപത്രികളും ആധുനിക സൗകര്യങ്ങളോടെ നവീകരിക്കുന്നതിനൊപ്പം അർബുദ രോഗികൾക്കും മറ്റും സൗജന്യചികിത്സ നൽകുമെന്നും അദ്ദേഹം അറിയിച്ചു.

തിരഞ്ഞെടുപ്പിൽ 129 വാഗ്ദാനങ്ങളായിരുന്നു വൈ‌.എസ്.ആർ കോൺഗ്രസ് പ്രതിപാദിച്ചിരുന്നത്. ഇതിൽ ഒരു വർഷവും രണ്ട് മാസങ്ങളും പൂർത്തിയാക്കുമ്പോൾ 83 എണ്ണം പൂർത്തിയാക്കിയതായും ആന്ധ്രാപ്രദേശ് മുഖ്യമന്ത്രി കൂട്ടിച്ചേർത്തു.