ന്യൂഡല്‍ഹി:തെരഞ്ഞെടുപ്പ് കമ്മിഷന്‍ അംഗങ്ങളില്‍ ഭൂരിപക്ഷത്തിന്‍റെ തീരുമാനങ്ങള്‍ മാത്രമേ പരസ്യപ്പെടുത്തുകയുള്ളൂവെന്ന് തെരഞ്ഞെടുപ്പ് കമ്മിഷന്‍. വിവാദങ്ങള്‍ പുറത്ത് വന്നതിന് ശേഷമുള്ള ആദ്യ യോഗമായിരുന്നു ഇന്നത്തേത്. യോഗത്തിൽ തെരഞ്ഞെടുപ്പ് കമ്മിഷണർ അശോക് ലവാസയും പങ്കെടുത്തു. തെരഞ്ഞെടുപ്പ് പെരുമാറ്റച്ചട്ടത്തിൽ കമ്മിഷൻ എടുത്ത നടപടികളിലെ ഭിന്നതയെ തുടർന്ന് മെയ് മൂന്നിന് ശേഷമുള്ള കമ്മിഷന്‍റെ യോഗങ്ങളിൽ അശോക് ലവാസ പങ്കെടുത്തിരുന്നില്ല. നരേന്ദ്ര മോദിക്കും അമിത്ഷാക്കും ക്ലീന്‍ ചിറ്റ് നല്‍കിയ പല കേസുകളിലും മറ്റ് രണ്ട് തെരഞ്ഞെടുപ്പ് കമ്മിഷന്‍ അംഗങ്ങളോട് അശോക് ലവാസ വിയോജിച്ചിരുന്നു. എന്നാൽ ലവാസയുടെ ഭിന്നിപ്പ് കമ്മിഷനിറക്കിയ ഉത്തരവുകളിൽ രേഖപ്പെടുത്തിയിരുന്നില്ല.
എന്നാൽ ഭൂരിപക്ഷത്തിന്‍റെ തീരുമാനങ്ങളാണ് നടപ്പാക്കുക എന്നും തീരുമാനത്തിൽ മുമ്പ് ഭിന്നതയുണ്ടായിരുന്നോ എന്നതിൽ പ്രസക്തിയില്ലെന്നും കമ്മിഷൻ വ്യക്തമാക്കി.