അമിത്ഷായുടെ പ്രസ്താവനയെ പിന്തുണച്ച് കേന്ദ്രമന്ത്രി വി കെ സിംഗ്

എത്രപേര്‍ കൊലപ്പെട്ടെന്നതിന് യഥാര്‍ഥ കണക്കില്ല. ആക്രമണം നടത്തിയ പ്രദേശത്തുണ്ടായിരുന്ന കെട്ടിടങ്ങളിലുണ്ടായിരുന്ന ഭീകരരുടെ എണ്ണം വെച്ചാണ് എത്രപേര്‍ കൊല്ലപ്പെട്ടുവെന്ന് ഏകദേശ കണക്കെടുത്തത്.

അതിർത്തി കടന്ന് ബലാക്കോട്ടില്‍ ഇന്ത്യ നടത്തിയ വ്യോമാക്രമണത്തില്‍ 250ത്തിലധികം ഭീകരര്‍ കൊല്ലപ്പെട്ടെന്ന അമിത് ഷായുടെ പ്രസ്താവനയെ പിന്തുണച്ച് മുന്‍ ആര്‍മി ചീഫും കേന്ദ്ര മന്ത്രിയുമായ വി കെ സിംഗ്. വ്യോമാക്രമണത്തില്‍ എത്രപേര്‍ കൊലപ്പെട്ടെന്നത് യഥാര്‍ഥ കണക്കില്ലെന്നും എന്നാല്‍ ബിജെപി അധ്യക്ഷന്‍ 250ല്‍ അധികം പേര്‍ കൊല്ലപ്പെട്ടിരിക്കാമെന്നാണ് പറഞ്ഞതെന്നും വി കെ സിംഗ് പറഞ്ഞു.

ആക്രമണം നടത്തിയ പ്രദേശത്തുണ്ടായിരുന്ന കെട്ടിടങ്ങളിലുണ്ടായിരുന്ന ഭീകരരുടെ എണ്ണം വെച്ചാണ് എത്രപേര്‍ കൊല്ലപ്പെട്ടുവെന്ന് ഏകദേശ കണക്കെടുത്തത്. സ്ഥിരീകരിച്ച കണക്കല്ല അദ്ദേഹം പറഞ്ഞതെന്നും അത്രയും പേര്‍ മരിച്ചിട്ടുണ്ടാകാമെന്നാണ് പറഞ്ഞതെന്നും വി കെ സിംഗ് പറഞ്ഞു. പുല്‍വാമ ആക്രമണത്തെ അപകടം എന്ന് പരാമര്‍ശിച്ച ദിഗ്‌വിജയ് സിംഗിന്‍റെ പ്രസ്താവനയെയും വി.കെ സിംങ് വിമര്‍ശിച്ചു. ഭീകരാക്രമണത്തെ അപകടം എന്ന് വിളിക്കുന്നത് നമ്മുടെ രാജ്യത്തിന്റെ രാഷ്ട്രീയത്തിന് ചേര്‍ന്നതല്ല. രാജീവ് ഗാന്ധിയുടെ കൊലപാതകത്തെയും അപകടമെന്ന് വിളിക്കുമോ എന്നും വി.കെ സിംങ് ചോദിച്ചു.

ബലാകോട്ട് ആക്രമണത്തിൽ 250 തീവ്രവാദികളെ കൊലപ്പെടുത്തിയെന്നാണ് അമിത് ഷാ പറഞ്ഞത്. എന്നാൽ ഇതുവരെ ഇന്ത്യ മരിച്ച ഭീകരരുടെ കണക്ക് ഔദ്യോഗികമായി സ്ഥിരീകരിച്ചിട്ടില്ലാത്ത സാഹചര്യത്തിലാണ് അമിത് ഷാ ഒരു തെരഞ്ഞെടുപ്പ് റാലിയിൽ ഇങ്ങനെ ഒരു വെളിപ്പെടുത്തൽ നടത്തിയത്. വ്യോമാക്രമണം യുദ്ധമുദ്ദേശിച്ച് നടത്തിയ സൈനിക നീക്കമല്ലെന്ന് വ്യക്തമാക്കി പ്രതിരോധ മന്ത്രി നിര്‍മല സീതാരാമന്‍ രംഗത്തെത്തി. തെരഞ്ഞെടുപ്പുമായി ഈ ആക്രമണത്തിന് ബന്ധമില്ലെന്നും നിര്‍മല സീതാരാമന്‍ പറഞ്ഞു.

മധ്യപ്രദേശിലെ തെരഞ്ഞെടുപ്പ് റാലിയില്‍ പ്രധാനമന്ത്രി നരേന്ദ്ര മോദി ഈ വിഷയത്തില്‍ പ്രതിപക്ഷത്തെ കുറ്റപ്പെടുത്തി രംഗത്തെത്തിയിരുന്നു. സൈനിക ശക്തിയെ അവിശ്വസിക്കുന്ന പ്രതിപക്ഷം പാകിസ്ഥാനുമായി സഖ്യത്തിലാവുകയാണെന്നും മോദി കൂട്ടിച്ചേർത്തു.

എന്നാല്‍ വ്യോമാക്രമണത്തിന്റെ തെളിവ് പുറത്ത് വിടണമെന്നും എത്ര ഭീകരര്‍ കൊല്ലപ്പെട്ടുവെന്നും അറിയാന്‍ രാജ്യത്തെ ജനതക്ക് അവകാശമുണ്ടെന്നും ബിജെപി സഖ്യകക്ഷിയായ ശിവസേന വ്യക്തമാക്കി.