ടിആർപി റേറ്റിങ് തട്ടിപ്പ് കേസ്: മുംബൈ പൊലീസ് കുറ്റപത്രം സമർപ്പിച്ചു

കേസുമായി ബന്ധപ്പെട്ട് റിപ്പബ്ലിക് ടിവിയുടെ വിതരണ മേധാവിയും മറ്റ് രണ്ട് ചാനലുകളുടെ ഉടമകളും ഉൾപ്പെടെ 12 പേരെ ഇതുവരെ ക്രൈംബ്രാഞ്ച് അറസ്റ്റ് ചെയ്തിട്ടുണ്ട്.

മുംബൈ: ടിആർപി (ടെലിവിഷൻ റേറ്റിംഗ് പോയിന്‍റുകൾ) അഴിമതി ആരോപണത്തിൽ കോടതിയിൽ കുറ്റപത്രം സമർപ്പിച്ച് മുംബൈ പൊലീസ്. കേസന്വേഷണം നടത്തുന്ന പൊലീസിന്‍റെ ക്രൈം ഇന്‍റലിജൻസ് യൂണിറ്റ് (സിഐയു) മജിസ്‌ട്രേറ്റ് കോടതിയിൽ കുറ്റപത്രം സമർപ്പിച്ചതായി പൊലീസ് പറഞ്ഞു.

ചാ​ന​ൽ ഉ​പ​ഭോ​ക്താ​ക്ക​ൾ​ക്ക് പ​ണം ന​ൽ​കി ടിആ​ർ​പി റേ​റ്റി​ങ്​ പെ​രു​പ്പി​ച്ചു എ​ന്നതാണ് കേ​സ്. ഒക്ടോബർ ആറിനാണ് ഇത് സംബന്ധിച്ച് എഫ്ഐആർ രജിസ്റ്റർ ചെയ്തത്. ചാനലുകളുടെ പ്രധാന വരുമാനം പരസ്യങ്ങൾ ആണെന്നിരിക്കെ ടിആർപി നിരക്ക് അതിപ്രധാനമാണ്. ബാ​രോ​മീ​റ്റ​ർ സ്ഥാ​പി​ച്ച് റേ​റ്റി​ങ്​ ന​ട​ത്തു​ന്ന ഹാ​ൻ​സ് റി​സ​ർ​ച്​ ഗ്രൂ​പ്പ്​ ന​ൽ​കി​യ പരാ​തി​യി​ൽ അ​ന്വേ​ഷ​ണം ന​ട​ത്തി​യ പൊ​ലീ​സ് റി​പ്പ​ബ്ലി​ക് ടിവി അ​സി​സ്​​റ്റ​ന്‍റ്​ വൈ​സ് പ്ര​സി​ഡ​ന്‍റ്​ ഘ​ന​ശ്യാം സിംഗിനെ​ അ​ട​ക്കം 12 പേ​രെ നേരത്തെ അ​റ​സ്​​റ്റ്​ ചെ​യ്തി​രുന്നു.

മുംബൈ ന​ഗ​ര​ത്തി​ൽ ടിആ​ർപി റേ​റ്റി​ങ്ങി​നാ​യി ര​ണ്ടാ​യി​ര​ത്തോ​ളം വീ​ടു​ക​ളി​ലാ​ണ് ഹാ​ൻ​സ് റി​സ​ർ​ച്​ ഗ്രൂ​പ്പ്​ ബാ​രോ​മീ​റ്റ​ർ സ്ഥാ​പി​ച്ച​ത്. വീ​ടു​ക​ളി​ൽ ആ​ളുകൾ ഇല്ലാത്തപ്പോഴും പ്ര​ത്യേ​ക ചാ​ന​ലു​ക​ൾ തു​റ​ന്ന് വെ​ക്കു​ന്ന​തി​ന് പ്ര​തി​മാ​സം 500 രൂ​പ വീ​തം ഉ​പ​ഭോ​ക്താ​ക്ക​ൾ​ക്ക് ന​ൽ​കി എ​ന്നാ​ണ് ക​ണ്ടെ​ത്ത​ൽ. ഇ​ത്ത​ര​ത്തി​ൽ പ​ണം പ​റ്റി​യ നാ​ല് ചാ​ന​ൽ ഉ​പ​ഭോ​ക്താ​ക്ക​ൾ കേ​സി​ൽ സാ​ക്ഷി​ക​ളാ​ണ്. ഇ​വ​ർ മ​ജി​സ്ട്രേ​റ്റി​ന് മു​മ്പാ​കെ മൊ​ഴി ന​ൽ​കി​യി​ട്ടുണ്ട്.