ഹൈദരാബാദ്: തെലങ്കാനയ്ക്കും ആന്ധ്രയ്ക്കും ഇടയിൽ കൃഷ്ണ, ഗോദാവരി നദി പങ്കിടൽ സംബന്ധിച്ച് ഒക്ടോബർ ആറിന് നടക്കാനിരിക്കുന്ന അപെക്സ് കൗൺസിൽ യോഗത്തിൽ കേന്ദ്രത്തെ കുറ്റപ്പെടുത്താൻ തെലങ്കാന മുഖ്യമന്ത്രി കെ. ചന്ദ്രശേഖർ റാവു ഉദ്യോഗസ്ഥരോട് ആവശ്യപ്പെട്ടു. കേന്ദ്രം ഒന്നും ചെയ്യുന്നില്ലെന്ന് പറഞ്ഞ അദ്ദേഹം തെലങ്കാനയ്ക്ക് വെള്ളം അനുവദിക്കുന്നതിൽ വ്യക്തത വേണമെന്ന് ആവശ്യപ്പെടാൻ ഉദ്യോഗസ്ഥരോട് നിർദ്ദേശിച്ചു. ഇക്കാര്യത്തിൽ തെലങ്കാനയുടെ ന്യായമായ ആവശ്യങ്ങളെ പിന്തുണച്ച് എല്ലാ വാദങ്ങളും തയ്യാറാക്കാൻ ഉദ്യോഗസ്ഥർക്ക് അദ്ദേഹം നിര്‍ദ്ദേശം നല്‍കി. അപെക്സ് കൗൺസിൽ യോഗത്തിൽ സ്വീകരിക്കേണ്ട തന്ത്രത്തെക്കുറിച്ച് ചർച്ച ചെയ്യാൻ മുഖ്യമന്ത്രി വ്യാഴാഴ്ച ജലവിഭവ വകുപ്പ് ഉദ്യോഗസ്ഥരുമായി ഉന്നതതല യോഗം ചേർന്നു.
സമ്പൂർണ്ണ ഡാറ്റയും വിവരങ്ങളും കേന്ദ്രസർക്കാരിൽ സമർപ്പിക്കേണ്ട പ്രശ്നങ്ങളും സംബന്ധിച്ച് ബന്ധപ്പെട്ട ഉദ്യോഗസ്ഥർക്ക് അദ്ദേഹം നിർദ്ദേശം നൽകി. തെലങ്കാനയിലെ ജനങ്ങളുടെ അവകാശങ്ങളെ ദുർബലപ്പെടുത്താനുള്ള ശ്രമങ്ങളെ എതിർക്കുകയും നിരസിക്കുകയും ചെയ്യണമെന്നും മുഴുവൻ വസ്തുതകളും അറിയിക്കാൻ അപെക്സ് കൗൺസിൽ യോഗം ഉപയോഗിക്കണമെന്നും ചന്ദ്രശേഖര്‍ റാവു പറഞ്ഞു. സംസ്ഥാന വിഭജന നിയമപ്രകാരം, ഒരു പുതിയ സംസ്ഥാനം രൂപീകരിക്കുമ്പോള്‍ അതിന് ജല വിഹിതം അനുവദിക്കണമെന്ന് അദ്ദേഹം ചൂണ്ടിക്കാട്ടി. 2014 ജൂൺ 2 നാണ് തെലങ്കാന സംസ്ഥാനം രൂപീകൃതമായത്. തെലങ്കാന സംസ്ഥാനത്തിന് വെള്ളം അനുവദിക്കണമെന്ന് അഭ്യർത്ഥിച്ച് 2014 ജൂൺ 14 ന് പ്രധാനമന്ത്രിക്ക് കത്തെഴുതിയതായും അദ്ദേഹം പറഞ്ഞു.