പ്രതിസന്ധി ഘട്ടത്തില്‍ ഒപ്പം നിന്നവർക്ക് നന്ദി അറിയിച്ച് ഐഎസ്ആർഒ

വിക്രം ലാന്‍ഡറുമായുള്ള ബന്ധം നഷ്‌ടപ്പെട്ട സാഹചര്യത്തില്‍ പിന്തുണച്ച എല്ലാവര്‍ക്കുമാണ് ട്വിറ്ററിലൂടെ ഐഎസ്‌ആര്‍ഒ നന്ദി അറിയിച്ചിരിക്കുന്നത്

ബെംഗളൂരു: ചന്ദ്രയാൻ-2 ദൗത്യത്തെ പിന്തുണച്ചവർക്ക് നന്ദി അറിയിച്ച് ഐഎസ്ആർഒ. വിക്രം ലാൻഡറുമായുള്ള ബന്ധം നഷ്‌ടപ്പെട്ട സാഹചര്യത്തില്‍ പിന്തുണ നല്‍കിയ എല്ലാവർക്കും ട്വിറ്ററിലൂടെ നന്ദി അറിയിക്കുകയായിരുന്നു ഐഎസ്ആർഒ.

"ഞങ്ങളുടെ കൂടെ നിന്നതിന് നന്ദി. ഇനിയും ഞങ്ങൾ യാത്ര തുടരും. ലോകമെമ്പാടുമുള്ള ഇന്ത്യക്കാരുടെ സ്വപ്‌നങ്ങളും പ്രതീക്ഷകളും ഞങ്ങളെ മുന്നോട്ട് നയിക്കും" എന്നാണ് ഐഎസ്ആർഒ ട്വീറ്റ് ചെയ്‌തത്. സെപ്‌റ്റംബർ ഏഴിന് അവസാന ഘട്ട ലാൻഡിങിനിടെ 2.1 കിലോമീറ്റർ അകലെ വച്ചാണ് വിക്രം ലാൻഡറുമായുള്ള ബന്ധം ഐഎസ്ആർഒയ്ക്ക് നഷ്‌ടമായത്. ചന്ദ്രനിലിറങ്ങിയ വിക്രം ലാൻഡറിനെ നാസയുടെ സഹായത്തോടെ കണ്ടെത്താനുള്ള ശ്രമത്തിലാണ് ഐഎസ്ആർഒ.