ഷിംല: ഹിമാചല്‍ ഗാനം പാടി മലയാളി പെണ്‍കുട്ടി ദേശീയ ശ്രദ്ധ ആകര്‍ഷിച്ചതിന് പിന്നാലെ കേരളത്തിന് അതേ രീതിയില്‍ സ്നേഹം നിറഞ്ഞൊരു മറുപടി എത്തിയിരിക്കുകയാണ്. തന്‍റെ മധുര ശബ്ദത്തില്‍ ''നിന്നെ കാണാന്‍ എന്നെക്കാളും ചന്തം തോന്നും'' എന്ന് തുടങ്ങുന്ന നാടോടിപ്പാട്ട് പാടി മലയാളികളുടെ മനം കവരുന്നത് സ്കൂള്‍ വിദ്യാര്‍ഥിയായ ദീക്ഷ ശര്‍മയാണ്. 'ഏക ഭാരതം ശ്രേഷ്ഠ ഭാരതം' പദ്ധതിയുടെ ഭാഗമായാണ് ദീക്ഷ മലയാള ഗാനം പഠിച്ചെടുത്തത്. ഈ കൊച്ചുമിടുക്കിയുടെ വീഡിയോ വൈറലായതിന് പിന്നാലെ കേരളത്തില്‍ നിന്ന് ഉള്‍പ്പെടെ നിരവധി പേരാണ് ദീക്ഷയെ സോഷ്യല്‍ മീഡിയയിലൂടെ അഭിനന്ദിക്കുന്നത്. തങ്ങളുടെ വിദ്യാര്‍ഥി മലയാള ഗാനം പാടി പരിപാടിയില്‍ പങ്കെടുത്തതില്‍ അഭിമാനമുണ്ടെന്ന് സോളനിലെ ചംണ്ഡി സ്കൂള്‍ പറയുന്നു.
കേരളത്തിന് മധുരം നിറഞ്ഞ മറുപടി; മലയാള ഗാനവുമായി ഹിമാചല്‍ പെണ്‍കുട്ടി