ചൈനീസ് ആപ്പുകളുടെ നിരോധനം ലംഘിച്ചാൽ കർശന നടപടിയെന്ന് മുന്നറിയിപ്പ് നൽകി സർക്കാർ

രാജ്യത്തിന്‍റെ പരമാധികാരം, സമഗ്രത, സുരക്ഷ എന്നിവക്ക് വെല്ലുവിളി ഉയർത്തുന്നുവെന്ന് ആരോപിച്ചാണ് ചൈനീസ് നിർമ്മിതമായ ടിക്ക് ടോക്ക്, കാംസ്കാനർ, യുസി ബ്രൗസർ എന്നിവയുൾപ്പെടെ 59 ആപ്ലിക്കേഷനുകൾ ജൂൺ 29 ന് ഇന്ത്യ നിരോധിച്ചത്.

ന്യൂഡൽഹി:59 ചൈനീസ് ആപ്ലിക്കേഷനുകൾ നിരോധിച്ചുകൊണ്ടുള്ള ഉത്തരവ് കർശനമായി പാലിക്കുന്നുണ്ടെന്ന് ഉറപ്പുവരുത്തണമെന്ന് സർക്കാർ. ഇക്കാര്യങ്ങളിൽ എന്തെങ്കിലും ലംഘനം ഉണ്ടായാൽ ഗുരുതരമായ നടപടിയെടുക്കുമെന്ന് സർക്കാർ മുന്നറിയിപ്പ് നൽകി.

ഇലക്ട്രോണിക്സ്, ഐടി സൈബർ നിയമങ്ങളും ഇ-സെക്യൂരിറ്റി ഡിപ്പാർട്ട്‌മെന്‍റും കമ്പനികൾക്ക് ഇമെയിൽ അയച്ചിട്ടുണ്ട്, ലിസ്റ്റുചെയ്ത ഏതെങ്കിലും ആപ്ലിക്കേഷൻ ഇപ്പോഴും ലഭ്യമാണെങ്കിലോ പ്രവർത്തിപ്പിക്കുകയോ ചെയ്താൽ അത് ഐടി നിയമപ്രകാരം കുറ്റകരമാണെന്നും ഉചിതമായ നിയമനടപടി സ്വീകരിക്കുമെന്നും മുന്നറിയിപ്പ് നൽകിയിട്ടുണ്ട്.

രാജ്യത്തിന്‍റെ പരമാധികാരം, സമഗ്രത, സുരക്ഷ എന്നിവക്ക് വെല്ലുവിളി ഉയർത്തുന്നുവെന്ന് ആരോപിച്ചാണ് ചൈനീസ് നിർമ്മിതമായ ടിക്ക് ടോക്ക്, കാംസ്കാനർ, യുസി ബ്രൗസർ എന്നിവയുൾപ്പെടെ 59 ആപ്ലിക്കേഷനുകൾ ജൂൺ 29 ന് ഇന്ത്യ നിരോധിച്ചത്.

കേന്ദ്ര വിവരസാങ്കേതിക മന്ത്രാലയം 2009 ലെ വിവരസാങ്കേതികവിദ്യാ നിയമത്തിലെ (പൊതുജനങ്ങളുടെ വിവരങ്ങൾ കൈയടക്കുന്നത് തടയുന്നതിനുള്ള നടപടിക്രമങ്ങളും സുരക്ഷകളും) സെക്ഷൻ 69 എ പ്രകാരമാണ് ചൈനീസ് ആപ്പുകൾക്ക് നിരോധനം ഏർപ്പെടുത്തിയത്.