പഞ്ചാബിൽ കൊവിഡ് പോരാട്ടം വിജയകരമെന്ന് മുഖ്യമന്ത്രി അമരീന്ദർ സിംഗ്

വൈറസിനെതിരായ പോരാട്ടത്തെ സൂചിപ്പിക്കുന്ന ഗാനം മുഖ്യമന്ത്രി അമരീന്ദർ സിംഗ് പുറത്തിറക്കി.

ചണ്ഡീഗഡ്: കൊവിഡിനെതിരായ പോരാട്ടം അവസാനിക്കാത്തതിനാൽ ഏവരും ജാഗ്രത തുടരണമെന്ന് പഞ്ചാബ് മുഖ്യമന്ത്രി അമരീന്ദർ സിംഗ്. ജൂൺ മൂന്ന് വരെ 2,376 പോസിറ്റീവ് കേസുകൾ പഞ്ചാബിൽ സ്ഥിരീകരിച്ചിട്ടുണ്ട്. നിലവിൽ 300 സജീവ കേസുകളാണ് ഉള്ളത്. ബുധനാഴ്ച 34 പേർക്കാണ് രോഗം റിപ്പോർട്ട് ചെയ്തത്. 12 പേർ രോഗമുക്തി നേടി.

ഇതിനിടെ ബോളിവുഡ് താരങ്ങളായ അമിതാഭ് ബച്ചൻ, കരീന കപൂർ, ഗുരുദാസ് മാൻ, ഹർഭജൻ സിംഗ് എന്നിവർ ചേർന്ന് അഭിനയിച്ച വൈറസിനെതിരായ പോരാട്ടത്തെ സൂചിപ്പിക്കുന്ന ഗാനം മുഖ്യമന്ത്രി അമരീന്ദർ സിംഗ് പുറത്തിറക്കി. പകർച്ചവ്യാധികളെ ചെറുക്കുന്നതിന് സാമൂഹ്യ അകലം പാലിക്കുക, പുറത്തിറങ്ങുമ്പോൾ മുഖംമൂടി ധരിക്കുക, കൈകൾ കഴുകുക എന്നീ സന്ദേശങ്ങൾ നൽകുന്നതാണ് ഗാനം.