കുടിയേറ്റക്കാരെ ഉപയോഗിച്ച് രാഷ്ട്രീയം കളിക്കരുതെന്ന് പ്രിയങ്ക ഗാന്ധിയോട് ശിവരാജ് സിംഗ് ചൗഹാൻ

മധ്യപ്രദേശിലെ കുടിയേറ്റ തൊഴിലാളികളുടെ ക്ഷേമത്തെക്കുറിച്ചുള്ള ചൗഹാന്‍റെ അവകാശവാദത്തെ "തമാശയെന്നും കെട്ടുണക്കിന് കള്ളത്തരങ്ങളെന്നും" മുതിർന്ന കോൺഗ്രസ് നേതാവ് കമൽ നാഥ് വിശേഷിപ്പിച്ചു

ഭോപ്പാൽ: കുടിയേറ്റക്കാർക്ക് ബസ് ഏര്‍പ്പെടുത്തുന്നതിനെ ചൊല്ലി കോൺഗ്രസും ഉത്തര്‍പ്രദേശ് സർക്കാരും തമ്മിൽ വാക്കുതർക്കം തുടരുന്നു. തൊഴിലാളികളെ ചൊല്ലി ഏറ്റവും മോശമായ രാഷ്ട്രീയം കളിക്കരുതെന്ന് കോൺഗ്രസ് നേതാവ് പ്രിയങ്ക ഗാന്ധിയോട് മധ്യപ്രദേശ് മുഖ്യമന്ത്രി ശിവരാജ് സിംഗ് ചൗഹാൻ.

തൊഴിലാളികളെ എങ്ങനെ സഹായിക്കാമെന്നതിനെക്കുറിച്ച് മനസിലാക്കാൻ മധ്യപ്രദേശ് സന്ദർശിക്കാനും അദ്ദേഹം പ്രിയങ്കാ ഗാന്ധിയോട് ആവശ്യപ്പെട്ടു. മധ്യപ്രദേശിലെ കുടിയേറ്റ തൊഴിലാളികളുടെ ക്ഷേമത്തെക്കുറിച്ചുള്ള ചൗഹാന്‍റെ അവകാശവാദത്തെ "തമാശയെന്നും കെട്ടുണക്കിന് കള്ളത്തരങ്ങളെന്നും" മുതിർന്ന കോൺഗ്രസ് നേതാവ് കമൽ നാഥ് വിശേഷിപ്പിച്ചു.

ചൊവ്വാഴ്ച അർദ്ധരാത്രി നിരവധി ട്വീറ്റുകൾ പോസ്റ്റ് ചെയ്ത ചൗഹാൻ, കുടിയേറ്റ തൊഴിലാളികൾക്ക് യാത്രാമാർഗത്തിൽ വളരെ ഫലപ്രദമായ ക്രമീകരണങ്ങൾ തന്‍റെ സർക്കാർ ഏർപ്പെടുത്തിയിട്ടുണ്ടെന്ന് അവകാശപ്പെട്ടു.

നിങ്ങൾ‌ക്ക് തൊഴിലാളികളെ സഹായിക്കാൻ‌ താൽ‌പ്പര്യമുണ്ടെങ്കിൽ‌, മധ്യപ്രദേശിലേക്ക് വരൂ. ഞങ്ങളുടെ ക്രമീകരണങ്ങൾ‌ കാണുകയും പഠിക്കുകയും ചെയ്യുക, ഇത്‌ നിങ്ങൾക്ക് സഹായകമാകും. മധ്യപ്രദേശിൽ‌ പട്ടിണിയോ, നടക്കുന്ന തൊഴിലാളികളെയോ നിങ്ങൾക്ക് കാണാൻ സാധിക്കില്ലെന്നും ഞങ്ങൾക്ക് ഫലപ്രദമായ ക്രമീകരണങ്ങൾ ചെയ്യുന്നുണ്ടെന്നും ചൗഹാൻ ട്വീറ്റ് ചെയ്തു.

കൊവിഡ് പ്രതിസന്ധി ഘട്ടത്തിൽ നിങ്ങളുടെ ഏറ്റവും മോശം രാഷ്ട്രീയത്തിന് തൊഴിലാളികളെ ഉപയോഗിക്കരുതെന്നും പ്രിയങ്കയോട് ട്വീറ്റിൽ ചൗഹാൻ ആവശ്യപ്പെട്ടു.

ഇന്നും സംസ്ഥാനത്തെ എല്ലാ പ്രധാന റോഡുകളും അതിർത്തികളും ആയിരക്കണക്കിന് കുടിയേറ്റ തൊഴിലാളികളാൽ നിറഞ്ഞിരിക്കുന്നു. ചിലർ നഗ്നപാദരായി നടക്കുന്നു, ചിലർ വീടുകളിലേക്ക് മടങ്ങാനുള്ള ശ്രമത്തിൽ കൈ വണ്ടികൾ, സൈക്കിളുകൾ, ഓട്ടോകൾ, ട്രക്കുകൾ എന്നിവയിൽ യാത്രചെയ്യുന്നുവെന്ന് കോൺഗ്രസ് നേതാവ് കമൽ നാഥ് പറഞ്ഞു.

കുടിയേറ്റക്കാരെ സുരക്ഷിതമായി വീടുകളിലേക്ക് കൊണ്ടുപോകാൻ കോൺഗ്രസ് ആയിരത്തോളം ബസുകൾ ഒരുക്കിയിട്ടുണ്ടെന്ന് പ്രിയങ്കാ ഗാന്ധി മുഖ്യമന്ത്രി യോഗി ആദിത്യനാഥിനോട് പറഞ്ഞതിനെത്തുടർന്ന് കോൺഗ്രസും ഉത്തർപ്രദേശ് സർക്കാരും വാക്കുതർക്കത്തിലാണ്. 1,000 ബസുകളുടെ പട്ടികയിൽ ഓട്ടോറിക്ഷകളുടെയും കാറുകളുടെയും ട്രക്കുകളുടെയും രജിസ്ട്രേഷൻ നമ്പറുകൾ ഉണ്ടെന്ന് യോഗി സർക്കാർ ആരോപിച്ചിരുന്നു.

ഇതിന്‍റെ ഭാഗമായി ചൊവ്വാഴ്ച ഉത്തർപ്രദേശ് കോൺഗ്രസ് അധ്യക്ഷൻ അജയ് കുമാർ ലല്ലു, പ്രിയങ്ക ഗാന്ധിയുടെ സെക്രട്ടറി എന്നിവർക്കെതിരെ വ്യാജരേഖ ചമച്ചതിന് പൊലീസ് കേസെടുത്തു.