ന്യൂഡല്‍ഹി; രാജ്യ തലസ്ഥാനം നേരിടുന്ന കടുത്ത അന്തരീക്ഷ മലനീകരണം കൂടുതല്‍ രൂക്ഷമാകുന്നതായി റിപ്പോർട്ട്. അന്തരീക്ഷ മലനീകരണത്തില്‍ രോഗം ബാധിച്ച് ആശുപത്രികളില്‍ എത്തുന്നവരുടെ എണ്ണത്തില്‍ വൻ വർദ്ധനയെന്ന് ആരോഗ്യ പ്രവർത്തകർ. ഏറ്റവും ഒടുവില്‍ പുറത്തുവരുന്ന റിപ്പോർട്ടുകൾ പ്രകാരം അന്തരീക്ഷ മലിനീകരണം ആരോഗ്യമുള്ളവരെയും രൂക്ഷമായി ബാധിച്ചു തുടങ്ങി.
ദീപാവലിക്ക് ശേഷം ശ്വാസ കോശ രോഗങ്ങൾക്കായി ഡല്‍ഹിയിലെ ആശുപത്രികളില്‍ എത്തുന്ന രോഗികളുടെ എണ്ണത്തില്‍ 15 ശതമാനത്തിന്‍റെ വർദ്ധനയുണ്ടായെന്ന് ഡല്‍ഹി എയിംസ് അധികൃതർ വ്യക്തമാക്കുന്നു. വിട്ടുമാറാത്ത ചുമയും ശ്വാസകോശ പ്രശ്നങ്ങളുമാണ് ഏറ്റവുമധികം ബാധിക്കുന്നത്. ഇന്ന് രാവിലെ ഡല്‍ഹി ലോധി റോഡില്‍ വായു ഗുണ നിലവാര സൂചിക ( എക്യുഐ ) 500 ആണ്. 2016 നു ശേഷമുള്ള ഏറ്റവും ഉയർന്ന നിരക്കാണിത്. സൂചിക 401 മുകളിലെത്തിയാല്‍ ഗുരുതര സ്ഥിതി വിശേഷം നിലനില്‍ക്കെയാണ് ഇന്ന് സൂചിക 500 ല്‍ എത്തിയായി റിപ്പോർട്ടുകൾ വരുന്നത്. 500ന് മുകളിലെത്തിയാല്‍ അതി ഗുരുതരമെന്നാണ് സഫർ ആപ്ളിക്കേഷൻ വ്യക്തമാക്കുന്നത്.
സിസ്റ്റം ഓഫ് എയർ ക്വാളിറ്റി ആൻഡ് വെതർ ഫോർകാസ്റ്റിങ് ആൻഡ് റിസർച്ച് ( സഫർ) എന്ന ആപ്ളിക്കേഷൻ വഴിയാണ് കേന്ദ്ര ഭൗമ ശാസ്ത്ര മന്ത്രാലയം വായു ഗുണ നിലവാര സൂചിക കണക്കാക്കുന്നത്. അതേസമയം, വായുമലിനീകരണത്തെ തുടർന്ന് ഡല്‍ഹിയിലെ റോഡ് ഗതാഗതം തടസപ്പെട്ടു. സിഗ്നേച്ചർ ബ്രിഡ്‌ജ്, അക്ഷർധാം ക്ഷേത്രം എന്നിവിടങ്ങളില്‍ കാഴ്ച തടസപ്പെട്ടതായി ദേശീയ മാധ്യമങ്ങൾ റിപ്പോർട്ട് ചെയ്തു.
വാഹനങ്ങളുടെ എണ്ണത്തിലുണ്ടായ ക്രമാതീതമായ വർദ്ധന, ഹരിയാന, പഞ്ചാബ് എന്നിവിടങ്ങളിലെ വൈക്കോല്‍ കത്തിക്കല്‍, മാലിന്യം കത്തിക്കല്‍, നിർമാണ പ്രവർത്തനങ്ങൾ, പടക്കം പൊട്ടിക്കല്‍ എന്നിവയെല്ലാം ഡല്‍ഹിയുടെ അന്തരീക്ഷ മലിനീകരണത്തിന് കാരണമാണ്.
ഡല്‍ഹിയില്‍ അന്തരീക്ഷ മലിനീകരണമുണ്ടാക്കുന്ന പൊടിപടലങ്ങൾ ( പർട്ടിക്കുലേറ്റ് മാറ്റർ )10 മൈക്രോ മീറ്റർ വ്യാസമുള്ളവ മുതല്‍ 2.5 പിഎം വരെയുള്ളവ വരെയാണ്. ഇതില്‍ 10 പിഎം വരെയുള്ളവ മാസ്‌ക് ധരിച്ചാല്‍ തടയാൻ കഴിയും. എന്നാണ് 2.5 പിഎം വരെയുള്ളവ മാസ്‌ക് കൊണ്ട് തടയാൻ കഴിയില്ല എന്നാണ് ആരോഗ്യ പ്രവർത്തകർ നല്‍കുന്ന വിശദീകരണം.
അരവിന്ദ് കെജ്‌രിവാൾ വിശദീകരിക്കുന്നു
ഡല്‍ഹിയിലെ അന്തരീക്ഷ മലിനീകരണത്തില്‍ ഇന്നലെ സുപ്രീംകോടതി രൂക്ഷ വിമർശനമാണ് നടത്തിയത്. ഡല്‍ഹി ജനതയ്ക്ക് എത്രകാലം ഇങ്ങനെ ജീവിക്കാൻ കഴിയുമെന്നാണ് കോടതി ചോദിച്ചത്. മലിനീകരണം കുറയ്ക്കാൻ കേന്ദ്ര സംസ്ഥാന സർക്കാരുകൾ എന്ത് ചെയ്തെന്നും കോടതി ചോദിച്ചു. അന്തരീക്ഷ മലിനീകരണം സംബന്ധിച്ച കേസ് സുപ്രീംകോടതി നാളെ പരിഗണിക്കും.
