മോദിക്ക് ഭ്രാന്താണ്; ചുണയുണ്ടെങ്കിൽ രാഷ്ട്രപതിഭരണം കൊണ്ടുവരട്ടെ- മമത ബാനർജി

രാഹുല്‍ ഗാന്ധി, ഒമര്‍ അബ്ദുള്ള, ചന്ദ്രബാബു നായിഡു, ശരത് പവാര്‍, അഖിലേഷ് യാദവ്, കമല്‍നാഥ്, അരവിന്ദ് കെജ്രിവാള്‍, ജിഗ്നേഷ് മേവാനി തുടങ്ങിയവർ മമതയുടെ സമരത്തിന് ഐക്യദാർഢ്യം പ്രകടിപ്പിച്ചിട്ടുണ്ട്.

കൊൽക്കത്ത: സംസ്ഥാനത്ത് രാഷ്ട്രപതി ഭരണമേർപ്പെടുത്തുമെന്ന അഭ്യൂഹങ്ങൾക്കിടയിലും മോദിക്കെതിരെ വെല്ലുവിളിയുമായി മമതാ ബാനർജി രംഗത്ത്. ചുണയുണ്ടെങ്കിൽ രാഷ്ട്രപതിഭരണമേർപ്പെടുത്തണമെന്നാണ് മോദിയെ മമത വെല്ലുവിളിച്ചിരിക്കുന്നത്. മോദിക്ക് ഭ്രാന്താണെന്നും അദ്ദേഹത്തിന്‍റെ കാലാവധി തീരാറായെന്നും മമത കൂട്ടിച്ചേർത്തു.

ബംഗാൾ സർക്കാറിനെതിരെ അവർ എന്തുവേണമെങ്കിലും ചെയ്യട്ടെ, അതിൽ ഭയമില്ല. എന്തുവന്നാലും നേരിടും. ജനാധിപത്യത്തെ തകർക്കാൻ ശ്രമിച്ചവരെ എതിർത്ത് തോൽപ്പിച്ച ചരിത്രം മാത്രമേ ബംഗാളിനുള്ളു മമത പറഞ്ഞു. കേന്ദ്രത്തിൽ നിന്നും ബിജെപിയെ താഴെയിറക്കാൻ സമയമായെന്നും അല്ലെങ്കിൽ രാജ്യം നാശത്തിലേക്ക് നീങ്ങുമെന്നും മമത കൂട്ടിച്ചേർത്തു.

ചിട്ടിതട്ടിപ്പു കേസുകളുമായി ബന്ധപ്പെട്ട് കൊല്‍ക്കത്ത പോലീസ് കമ്മിഷണര്‍ രാജീവ് കുമാറിനെ ചോദ്യംചെയ്യാനെത്തിയ സി.ബി.ഐ. സംഘത്തിന്‍റെ നടപടിക്കെതിരെ മമത ബാനർജി ഇന്നലെ മുതൽ സത്യാഗ്രഹത്തിലാണ്. മമതയോടൊപ്പം നിരവധി മന്ത്രിമാരും പാര്‍ട്ടി പ്രവര്‍ത്തകരും മെട്രോചാനലിലെ സമരപന്തലിലുണ്ട്.