ന്യൂഡല്‍ഹി:തുടര്‍ച്ചയായ മൂന്നാം വട്ടവും ഡല്‍ഹി മുഖ്യമന്ത്രിയായി അരവിന്ദ് കെജ്രിവാള് സത്യപ്രതിജ്ഞ ചെയ്‌തു. രാംലീല മൈതാനത്ത് നടന്ന ചടങ്ങില്‍ ലഫ്‌റ്റനന്‍റ് ഗവര്‍ണര്‍ അനില്‍ ബൈജല്‍ സത്യവാചകം ചൊല്ലിക്കൊടുത്തു. മറ്റ് സംസ്ഥാനങ്ങളിലെ മുഖ്യമന്ത്രിമാരും, രാഷ്‌ട്രീയ നേതാക്കളും പങ്കെടുക്കാത്ത വേദിയില്‍ അമ്പതോളം സാധാരണക്കാര്‍ക്ക് സ്ഥാനം കൊടുത്തത് ആം ആദ്‌മി സര്‍ക്കാരിന്‍റെ ജനകീയ മുഖത്തിന് സൗന്ദര്യം പകര്‍ന്നു. പ്രധാനമന്ത്രി നരേന്ദ്ര മോദിയെ ക്ഷണിച്ചിരുന്നെങ്കിലും അദ്ദേഹം ചടങ്ങിനെത്തിയില്ല.
മനീഷ് സിസോദിയ, സത്യേന്ദ്ര കുമാര്‍ ജെയിന്‍, ഗോപാല്‍ റായ്, ഇമ്രാന്‍ ഹുസൈന്‍, രാജേന്ദ്ര പാല്‍ ഗൗതം, കൈലാഷ് ഗെലോട്ട് എന്നിവര്‍ മന്ത്രിമാരായും സത്യപ്രതിജ്ഞ ചെയ്‌തു. കഴിഞ്ഞ മന്ത്രിസഭയിലും ഇവര്‍ അംഗങ്ങളായിരുന്നു.