പനാജി: കർണാടകയിൽ രാഷ്ട്രീയ പ്രതിസന്ധി രൂക്ഷമാകുന്ന സാഹചര്യത്തിൽ കോൺഗ്രസിന് വീണ്ടും തിരിച്ചടി. അയൽ സംസ്ഥാനമായ ഗോവയിലെ പത്ത് കോൺഗ്രസ് എംഎൽഎമാർ ബിജെപിയിലേക്ക് ചേരാൻ ഒരുങ്ങുന്നു. ആകെ 15 അംഗങ്ങളാണ് ഗോവ നിയമസഭയിൽ കോൺഗ്രസിന് ഉള്ളത്.
പ്രതിപക്ഷ നേതാവ് ചന്ദ്രകാന്ത് കാവ്‌ലേക്കറുടെ നേതൃത്വത്തിലുള്ള സംഘം പാര്‍ട്ടി വിടുകയാണെന്ന് കാണിച്ച് നിയമസഭാ സ്പീക്കർ രാജേഷ് പട്‌നെക്കർക്ക് കത്ത് നൽകി. ഇന്നലെ വൈകീട്ടാണ് ഇവർ നിയമസഭ മന്ദിരത്തിലെത്തി സ്പീകർക്ക് കത്ത് നൽകിയത്. ഈ സമയം ഗോവ മുഖ്യമന്ത്രി പ്രമോദ് സാവന്ത്, ഡെപ്യൂട്ടി സ്പീക്കർ മൈക്കൽ ലോബോ എന്നിവരും അവിടെ ഉണ്ടായിരുന്നു.