അതിശൈത്യം; രാജസ്ഥാനിൽ റോഡപകടം വർധിക്കുന്നു

അൽ‌വാറിലെ ഡൂഗെറയിലെ ദേശീയപാത 8ൽ മൂടൽ മഞ്ഞ് കാഴ്ച മറച്ചതോടെയാണ് വാഹനാപകടം ഉണ്ടായത്. അപകടത്തിൽ പരിക്കേറ്റ നിരവധിപ്പേരെ ആശുപത്രിയിൽ പ്രവേശിപ്പിച്ചു

ജയ്പൂർ:മൂടൽ മഞ്ഞിനെ തുടർന്ന് രാജസ്ഥാനിലെ ആൽവാറിൽ വാഹനാപകടം പതിവാകുന്നു. മൂടൽ മഞ്ഞ് കാഴ്ച മറച്ചതോടെ വാഹനത്തിന്‍റെ നിയന്ത്രണം നഷ്ടമായാണ് അപകടങ്ങൾ ഉണ്ടാകുന്നത്. മിക്ക ഇടങ്ങളിലും മൂടൽമഞ്ഞും തുടരുന്നു. സംസ്ഥാനത്ത് പലയിടങ്ങളിലും ശീതക്കാറ്റ് വീശുന്നുണ്ട്. സിക്കാർ, ജുഞ്ജുനു, ഭരത്പൂർ, ധോൽപൂർ, അജ്മീർ, ജയ്പൂർ, ചുരു, എന്നിവടങ്ങളിലാണ് ശീതക്കാറ്റ് വീശുന്നത്.

അയൽസംസ്ഥാനങ്ങളായ ഹരിയാന, പഞ്ചാബ് എന്നിവിടങ്ങളിലും സമാനമായ കാലാവസ്ഥയാണ്. പല സംസ്ഥാനങ്ങളിലും ജനജീവിതം ദുസഹം. അതേസമയം ഉത്തരേന്ത്യയിൽ ചില സ്ഥലങ്ങളിൽ വരും ദിവസങ്ങളിൽ നേരിയ മഴ ലഭിക്കുമെന്ന് കാലാവസ്ഥാ കേന്ദ്രം അറിയിച്ചു. കനത്ത മഞ്ഞിനെ തുടർന്ന് ഡൽഹിയിൽ റോഡ് - വ്യോമ ഗതാഗതം താറുമാറായി.