ന്യൂഡൽഹി : ഇന്ത്യൻ ക്യാമ്പിലെ കൊവിഡ് വ്യാപനത്തെ തുടർന്ന് ഉപേക്ഷിച്ച ഇന്ത്യ- ഇംഗ്ലണ്ട് അഞ്ചാം ക്രിക്കറ്റ് ടെസ്റ്റ് പുനക്രമീകരിക്കണമെന്ന് ആവശ്യപ്പെട്ട് ബിസിസിഐ. കൊവിഡിന്‍റെ പശ്ചാത്തലത്തിൽ കളിക്കാന്‍ ആശങ്കയുണ്ടെന്ന് ഇന്ത്യന്‍ താരങ്ങള്‍ അറിയിച്ചതിനെത്തുടർന്ന് ഇംഗ്ലണ്ട് ആന്‍ഡ് വെയില്‍സ് ക്രിക്കറ്റ് ബോര്‍ഡും ബിസിസിഐയും നടത്തിയ ചര്‍ച്ചയിലാണ് മത്സരം റദ്ദാക്കാൻ തീരുമാനിച്ചത്. അഞ്ച് മത്സരങ്ങളുടെ പരമ്പരയിൽ 2-1 ന് മുന്നിലാണ് ഇന്ത്യ.
റദ്ദാക്കിയ മത്സരം പുനക്രമീകരിക്കണമെന്ന് ഇംഗ്ലണ്ട് ക്രിക്കറ്റ് ബോർഡിനോട് ആവശ്യപ്പെട്ടിട്ടുണ്ടെന്നും മത്സരം പുനക്രമീകരിക്കുന്നതിനായി രണ്ട് ബോർഡുകളും പരിശ്രമിക്കുമെന്നും ബിസിസിഐ അറിയിച്ചു. ബിസിസിഐ എപ്പോഴും കളിക്കാരുടെ സുരക്ഷക്കും ക്ഷേമത്തിനുമാണ് പ്രാധാന്യം നൽകുന്നത്. ഈ പ്രയാസകരമായ സമയങ്ങളിൽ ഇസിബിയുടെ സഹകരണത്തിന് നന്ദി അറിയിക്കുന്നു. കൂടാതെ ആവേശകരമായ ഒരു പരമ്പര പൂർത്തിയാക്കാൻ കഴിയാത്തതിന് ആരാധകരോട് ക്ഷമ ചോദിക്കുന്നു, ബിസിസിഐ കൂട്ടിച്ചേർത്തു.