ന്യൂഡൽഹി: ട്രേഡ് യൂണിയനുകൾ ആഹ്വാനം ചെയ്‌ത ദ്വിദിന പണിമുടക്ക് തിങ്കൾ, ചൊവ്വ (28,29 തീയതികളില്‍) ദിവസങ്ങളിൽ ബാങ്കിങ് സേവനങ്ങളെ ഭാഗികമായി ബാധിച്ചേക്കും. ഒരു വിഭാഗം ബാങ്ക് ജീവനക്കാർ പണിമുടക്കിനെ പിന്തുണച്ച പശ്ചാത്തലത്തിലാണ് ബാങ്കിങ് സേവനങ്ങളെ പണിമുടക്ക് ബാധിക്കുക. കേന്ദ്ര സർക്കാരിന്‍റെന്റെ ജനവിരുദ്ധ സാമ്പത്തിക നയങ്ങളിലും തൊഴിലാളി തൊഴിലാളി വിരുദ്ധ നയങ്ങളിലും പ്രതിഷേധിച്ചാണ് കേന്ദ്ര ട്രേഡ് യൂണിയനുകളുടെയും വിവിധ മേഖല സ്വതന്ത്ര തൊഴിലാളി യൂണിയനുകളുടെയും സംയുക്ത ഫോറം തിങ്കളും ചൊവ്വയും പണിമുടക്കിന് ആഹ്വാനം ചെയ്തിരിക്കുന്നത്.
തൊഴില്‍ കോഡുകള്‍ പിന്‍വലിക്കുക, വിലക്കയറ്റം തടയുക, ദേശീയ തൊഴിലുറപ്പ് പദ്ധതിക്ക് വിഹിതം വര്‍ധിപ്പിക്കുക, അവശ്യ പ്രതിരോധ സേവന നിയമം റദ്ദാക്കുക, കര്‍ഷകസംഘടനകളുടെ അവകാശപത്രിക അംഗീകരിക്കുക, പെട്രോളിയം ഉല്‍പന്നങ്ങളുടെ കേന്ദ്ര നികുതി കുറയ്ക്കുക, കരാർ തൊഴിലാളികളെ സ്ഥിരപ്പെടുത്തുക തുടങ്ങിയ 12 ഇന ആവശ്യങ്ങള്‍ ഉന്നയിച്ചാണ് പണിമുടക്ക്. പൊതുമേഖല ബാങ്കുകളുടെ സ്വകാര്യവൽക്കരണം നിർത്തി അവയെ ശക്തിപ്പെടുത്തുക, കിട്ടാക്കടങ്ങൾ വേഗത്തിൽ വീണ്ടെടുക്കുക, ബാങ്കുകളുടെ നിക്ഷേപ നിരക്കുകൾ ഉയർത്തുക, ഉപഭോക്താക്കളുടെ സേവന നിരക്കുകൾ കുറയ്ക്കുക, പഴയ പെൻഷൻ പദ്ധതി പുനഃസ്ഥാപിക്കുക തുടങ്ങിയ ആവശ്യങ്ങൾ ബാങ്ക് യൂണിയൻ സർക്കാരിനോട് ആവശ്യപ്പെടുന്നതായി എഐബിഇഎ ജനറൽ സെക്രട്ടറി സി.എച്ച് വെങ്കിടാചലം പറഞ്ഞു.