മുംബൈ : ലഹരിമരുന്ന് കേസിൽ ജാമ്യം ലഭിച്ചെങ്കിലും ആര്യൻ ഖാന് ഇന്ന് ജയിൽ മോചിതനാകാൻ കഴിഞ്ഞില്ല. വൈകിട്ട് 5.30 നുള്ളിൽ ജാമ്യ നടപടികൾ പൂർത്തിയാക്കാനാകാത്തതിനാലാണ് ആര്യന് വെള്ളിയാഴ്‌ച കൂടി ജയിലിൽ തുടരേണ്ടിവരുന്നത്. ശനിയാഴ്‌ച രാവിലെ താരപുത്രനെ ജയിൽ മോചിതനാക്കും.
ജയിൽ ചട്ടപ്രകാരം ജാമ്യ ഉത്തരവ് വൈകിട്ട് 5.30 നുള്ളിൽ പുറത്തെ ജാമ്യപ്പെട്ടിയിൽ ( ബെയിൽ ബോക്‌സ്) നിക്ഷേപിക്കണം. എങ്കിൽ മാത്രമേ ജാമ്യം ലഭിച്ച ആൾക്ക് അന്ന് തന്നെ ജയിൽ മോചിതനാകാൻ സാധിക്കുകയുള്ളൂ. എന്നാൽ ആര്യന്‍റെ അഭിഭാഷകർക്ക് സമയ പരിധിക്കുള്ളിൽ നടപടികൾ പൂർത്തിയാക്കാനായില്ല.