Anirudh Ravichander Faces Allegations Of Plagiarism In Leo : 'ലിയോ'യിലെ ഗാനം കോപ്പിയടിയോ? വിവാദങ്ങളിൽ കുടുങ്ങി അനിരുദ്ധ് രവിചന്ദർ

Is the song 'Ordinary Man' in 'Leo' plagiarised? : 'ലിയോ'യിലെ അനിരുദ്ധ് ഈണമിട്ട 'ഓർഡിനറി പേഴ്‌സൺ' ബെലാറഷ്യൻ സംഗീതജ്ഞൻ ഒട്‌നിക്കയുടെ 'വേർ ആർ യു?' ഗാനത്തിന്‍റെ കോപ്പിയടിയാണെന്നാണ് ആരോപണം

ഹൈദരാബാദ്: ലോകേഷ് കനകരാജ് - വിജയ് കൂട്ടുകെട്ടിൽ ഇറങ്ങിയ 'ലിയോ' തിയേറ്ററുകളിൽ കലക്ഷൻ റെക്കോർഡുകൾ ഭേദിച്ചുകൊണ്ട് മുന്നേറുകയാണ്. കേരളത്തിലുൾപ്പടെ മുൻപെങ്ങും കാണാത്ത വിധമുള്ള വരവേൽപ്പാണ് ഈ വിജയ് ചിത്രത്തിന് ലഭിച്ചുകൊണ്ടിരിക്കുന്നത്. എന്നാൽ ബോക്‌സോഫിസിലെ കുതിപ്പിനിടെ ചില 'കോപ്പിയടി' വിവാദങ്ങളിൽ കൂടി പെട്ടിരിക്കുകയാണ് 'ലിയോ'.

ചിത്രത്തിലെ ഗാനങ്ങൾ സംബന്ധിച്ചാണ് സമൂഹ മാധ്യമങ്ങളിൽ ഉൾപ്പടെ ചർച്ചകൾ കൊഴുക്കുന്നത്. 'ലിയോ'യിൽ അനിരുദ്ധ് രവിചന്ദർ ഈണമിട്ട 'ഓർഡിനറി പേഴ്‌സൺ' മറ്റൊരു ഗാനത്തിന്‍റെ കോപ്പിയടി ആണെന്നാണ് ആരോപണം. ബെലാറഷ്യൻ സംഗീതജ്ഞൻ ഒട്‌നിക്കയുടെ (Belarusian musician Otnicka) 'വേർ ആർ യു?' (Where Are You?) എന്ന പാട്ടുമായി 'ഓർഡിനറി പേഴ്‌സണ്' സാമ്യമുണ്ടെന്നാണ് ആരോപണം ഉയരുന്നത് (Anirudh Ravichander Faces allegations of plagiarism in Leo).

വിഷയം ഏതായാലും സമൂഹ മാധ്യമങ്ങളിൽ വലിയ ചർച്ചയായിരിക്കുകയാണ്. ഇരു ഗാനങ്ങളും തമ്മിൽ വലിയ സാമ്യതകൾ ഉണ്ടെന്നാണ് യൂട്യൂബിലും ഇൻസ്റ്റഗ്രാമിലും എല്ലാം പ്രേക്ഷകർ പറയുന്നത്. ഇതിനിടെ ഓൺലൈൻ ചാറ്റിനെത്തുടർന്ന്, ഒറിജിനൽ ആർട്ടിസ്റ്റായ ഒട്‌നിക്ക ഈ അവകാശവാദങ്ങളോട് പ്രതികരിച്ചുകൊണ്ട് രംഗത്തെത്തി.

ഗാനം ഉപയോഗിക്കാൻ ആരും തന്‍റെ അനുമതി തേടിയിട്ടില്ലെന്ന് അദ്ദേഹം വെളിപ്പെടുത്തി. തുടർന്ന് വിശദമായ ഇൻസ്റ്റഗ്രാം പോസ്റ്റിൽ ഒട്‌നിക്ക ഈ വിഷയത്തെ അഭിസംബോധന ചെയ്യുകയും ചെയ്‌തു. വിഷയം സജീവമായി അന്വേഷിക്കുകയാണെന്നും യഥാസമയം അപ്‌ഡേറ്റുകൾ നൽകുമെന്നും അദ്ദേഹം ഉറപ്പ് നൽകി.

"ലിയോ എന്ന സിനിമയെക്കുറിച്ചുള്ള നിങ്ങളുടെ സന്ദേശങ്ങൾക്ക് നന്ദി. ഞാൻ എല്ലാം കാണുന്നുണ്ട്, പക്ഷേ എല്ലാവർക്കും മറുപടി നൽകുക എന്നത് അസാധ്യമാണ്. മെയിൽ സന്ദേശങ്ങൾ, ഇൻസ്റ്റഗ്രാം, കൂടാതെ യൂട്യൂബിൽ 'വേർ ആർ യു?' എന്ന വീഡിയോയ്‌ക്ക് കീഴിലും ആയിരക്കണക്കിന് കമന്‍റുകൾ കൊണ്ട് നിറഞ്ഞിരിക്കുന്നു.

നിലവിൽ സ്ഥിതി വളരെ അവ്യക്തമാണ്... ഞങ്ങൾ ഇത് പരിശോധിക്കുന്നുണ്ട്. എല്ലാ കാര്യങ്ങളും ഞാൻ വിലയിരുത്തും. അതുവരെ ആരെയും കുറ്റപ്പെടുത്തുന്നില്ല'- ഒട്‌നിക്ക കുറിച്ചു.

അതേസമയം നിരവധി പേരാണ് വിഷയത്തിൽ പ്രതികരണമറിയിച്ച് രംഗത്തെത്തുന്നത്. അനിരുദ്ധിനെ എതിർത്തും അനുകൂലിച്ചും ചർച്ചകൾ സജീവമാണ്. വിഷയത്തിൽ 'ലിയോ'യുടെ അണിയറ പ്രവർത്തകർ ഇതുവരെയും പ്രതികരിച്ചിട്ടില്ല (Anirudh Ravichander has been accused of plagiarism in Leo).

അനിരുദ്ധ് കോപ്പിയടി ആരോപണങ്ങൾ നേരിടുന്നത് ഇതാദ്യമല്ല. 2018ൽ 'കൊലമാവ് കോകില' എന്ന ചിത്രത്തിലെ 'കല്യാണ വയസു' എന്ന ഗാനം സന്നന്‍റെ 'ഡോണ്ട് ലൈ'യുടെ പകർപ്പാണെന്ന് ആരോപണം ഉയർന്നിരുന്നു. പിന്നാലെ 'ബീറ്റ്‌സ് ബൈ മന്ത്ര'യിൽ നിന്നാണ് താൻ ബീറ്റുകളുടെ അവകാശം നിയമപരമായി നേടിയതെന്ന് അനിരുദ്ധ് അന്ന് വ്യക്തമാക്കുകയും ചെയ്‌തിരുന്നു.

എന്നിരുന്നാലും, പാട്ടിന്‍റെ അവകാശത്തിനായി തന്നെ സമീപിച്ചിട്ടില്ലെന്ന ഒട്‌നിക്കയുടെ അവകാശവാദം ഉൾപ്പെടുന്ന നിലവിലെ സാഹചര്യം അൽപം ഗൗരവമേറിയത് തന്നെയാണെന്നാണ് പ്രേക്ഷകർ പറയുന്നത്. ഈ വിവാദവുമായി ബന്ധപ്പെട്ട് വർധിച്ചുവരുന്ന ആശങ്കകളും സംശയങ്ങളും ഇല്ലാതാക്കാൻ അനിരുദ്ധിൽ നിന്ന് വിശദീകരണത്തിനായി കാത്തിരിക്കുകയാണ് ഇവർ.

ഒട്‌നിക്കയുടെ ‘വേർ ആർ യു’ 2019ലാണ് യൂട്യൂബിൽ അപ്‌ലോഡ് ചെയ്യപ്പെട്ടത്. നിലവിൽ 61 മില്യൻ കാഴ്‌ചക്കാരുണ്ട് ഈ വീഡിയോയ്‌ക്ക്. ലിയോയിലെ ‘ഓർഡിനറി പേഴ്‌സൺ’ പുറത്തിറങ്ങി ഏതാനും മണിക്കൂറുകൾ കൊണ്ട് രണ്ട് മില്യണിലധികം പ്രേക്ഷകരെയാണ് സ്വന്തമാക്കിയത്. ഹെയ്‌സൻബർഗ് ആണ് ഈ പാട്ടിന് വരികൾ കുറിച്ചത്. നിഖിത ഗാന്ധിയാണ് ഗാനം ആലപിച്ചിരിക്കുന്നത്.