സുവര്‍ണ്ണ ജൂബിലി ആഘോഷിച്ച് താര ദമ്പതികള്‍:ബോളിവുഡിലെ മുതിർന്ന താര ദമ്പതികളായ അമിതാഭ് ബച്ചനും ജയ ബച്ചനും തങ്ങളുടെ വിവാഹ ജീവിതത്തില്‍ സുവര്‍ണ്ണ ജൂബിലി ആഘോഷിക്കുകയാണ്. അച്ഛനും അമ്മയും വിവാഹ ജീവിതത്തിന്‍റെ 50 വര്‍ഷങ്ങള്‍ പൂര്‍ത്തിയാക്കുന്ന സാഹചര്യത്തില്‍ മനോഹരമായൊരു സമ്മാനവുമായി മകള്‍ ശ്വേത ബച്ചന്‍ രംഗത്തെത്തിയിരിക്കുകയാണ്.
മകളുടെ മനോഹര സമ്മാനം:മാതാപിതാക്കളുടെ ഒരു പഴയകാല ചിത്രമാണ് ശ്വേത ഇന്‍സ്‌റ്റഗ്രാമില്‍ പങ്കുവച്ചിരിക്കുന്നത്. അമിതാഭ് ബച്ചന്‍റെയും ജയ ബച്ചന്‍റെയും പഴയ ഒരു മോണോക്രോം ഫോട്ടോയാണ് (ഒരു നിറം മാത്രമുള്ള ചിത്രം) ശ്വേത പങ്കുവച്ചത്. അമിതാഭ് ബച്ചനെ നോക്കി പുഞ്ചിരിക്കുന്ന ജയ ബച്ചനെയാണ് ചിത്രത്തില്‍ കാണാനാവുക. ചിത്രത്തില്‍ ജയ ബച്ചന്‍ സാരിയും അമിതാഭ് ബച്ചന്‍ ഷര്‍ട്ടും പാന്‍റ്‌സുമാണ് ധരിച്ചിരിക്കുന്നത്.
ശ്വേതയുടെ ഹൃദയസ്‌പര്‍ശിയായ കുറിപ്പ്: ചിത്രത്തിനൊപ്പം ഹൃദയസ്‌പര്‍ശിയായ ഒരു കുറിപ്പും ശ്വേത പങ്കുവച്ചിട്ടുണ്ട്. 'അച്ഛനും അമ്മയ്‌ക്കും സന്തോഷകരമായ 50-ാം വിവാഹ വാര്‍ഷികം, നിങ്ങൾ ഇപ്പോൾ 'സുവർണ്ണ ജൂബിലി'യിലാണ്. ഒരു നീണ്ട ദാമ്പത്യ ജീവിതത്തിന്‍റെ രഹസ്യം എന്താണെന്ന് ഒരിക്കൽ ഞാന്‍ ചോദിച്ചപ്പോൾ, എന്‍റെ അമ്മ നല്‍കിയ മറുപടി - സ്നേഹം എന്നാണ്. എന്‍റെ അച്ഛന്, ഭാര്യ എപ്പോഴും ശരിയായിരുന്നു എന്നാണ് ഞാന്‍ കരുതുന്നത്. അവര്‍ക്ക് നീട്ടിയും കുറുക്കിയും പറയാനുള്ളത് ഇതാണ്' -ചിത്രം പങ്കുവച്ച് ശ്വേത ബച്ചന്‍ കുറിച്ചു.
ആരാധകരും താര ദമ്പതികളുടെ 50ാം വിവാഹ വാര്‍ഷികം ആഘോഷിക്കുകയാണ്. ശ്വേതയുടെ പോസ്‌റ്റിന് പിന്നാലെ കമന്‍റുകളുമായി ആരാധകരും ഒഴുകിയെത്തി. ചുവന്ന ഹാര്‍ട്ട് ഇമോജികളും ഫയര്‍ ഇമോജികളുമായി നിരവധി പേര്‍ കമന്‍റ്‌ ബോക്‌സ്‌ നിറച്ചു.