ദേശസ്‌നേഹം വിളിച്ചോതി അമർ ജവാൻ ഫ്യുവൽസ്; പെട്രോൾ പമ്പിലെ വരുമാനം വീരമൃത്യു വരിച്ച ജവാന്മാരുടെ കുടുംബത്തിന്

രാജ്യത്തിന് വേണ്ടി വീരമൃത്യു വരിച്ച പട്ടാളക്കാരുടെ മക്കളുടെ ഉന്നതവിദ്യാഭ്യാസത്തിനും വിവാഹത്തിനുമായാണ് പെട്രോൾ പമ്പിന്‍റെ വരുമാനം ഉപയോഗിക്കുന്നതെന്ന് അമർ ജവാൻ ഫ്യുവൽസ് ഡയറക്‌ടർ ഹരീഷ് ഭായ് ജോഷി വ്യക്തമാക്കി.

റായ്‌പൂർ (ഛത്തീസ്‌ഗഡ്):ഇന്ത്യയുടെ 74-ാമത് റിപ്പബ്ലിക് ദിനത്തിൽ, രാജ്യസ്‌നേഹത്തിന്‍റെ ചൈതന്യം ഉണർത്തുന്ന ഛത്തീസ്‌ഗഡിലെ ഒരു പെട്രോൾ പമ്പ് ശ്രദ്ധ നേടിയിരിക്കുകയാണ്. റായ്‌പൂർ-ബിലാസ്‌പൂർ ദേശീയ പാതയിൽ ധർസിവ ഗ്രാമത്തിൽ സ്ഥിതി ചെയ്യുന്ന അമർ ജവാൻ ഫ്യുവൽസാണ് മാതൃകാപരമായ പ്രവൃത്തികളിലൂടെ ജനശ്രദ്ധ നേടുന്നത്. പെട്രോൾ പമ്പിൽ നിന്ന് ലഭിക്കുന്ന വരുമാനം വീരമൃത്യു വരിച്ച പട്ടാളക്കാരുടെ കുടുംബങ്ങളെ സഹായിക്കുന്നതിനായാണ് ഉപയോഗിക്കുന്നത്.

പെട്രോൾ പമ്പിന്‍റെ വരുമാനത്തിൽ നിന്ന് ഒരു രൂപ പോലും മറ്റാവശ്യത്തിനായി ചെലവഴിക്കുന്നില്ല. പെട്രോൾ പമ്പിൽ നിന്നുള്ള വരുമാനം വീരമൃത്യു വരിച്ച സൈനികരുടെ മക്കളുടെ വിദ്യാഭ്യാസത്തിനും വിവാഹത്തിനുമൊക്കെയായാണ് ഉപയോഗിക്കുന്നതെന്ന് അമർ ജവാൻ ഫ്യുവൽസ് ഡയറക്‌ടർ ഹരീഷ് ഭായ് ജോഷി പറഞ്ഞു. നമ്മുടെ രാജ്യത്ത സംരക്ഷിക്കാൻ ജീവൻ ബലിയർപ്പിച്ച ധീര സൈനികരുടെ കുടുംബത്തെ സംരക്ഷിക്കേണ്ടത് നമ്മുടെ ഉത്തരവാദിത്തമാണ്. രാജ്യത്തെ ഓരോ പൗരനും അവരെ പിന്തുണയ്‌ക്കണമെന്നും ജോഷി കൂട്ടിച്ചേർത്തു.

പെട്രോൾ പമ്പിലെത്തുന്ന ഉപഭോക്താക്കളെ ഞങ്ങളുടെ അതിഥികളായാണ് സത്ക്കരിക്കുന്നത്. അവർക്ക് മികച്ച സേവനം ഞങ്ങൾ ഉറപ്പാക്കുന്നു. രണ്ട് വർഷമായി പെട്രോൾ പമ്പ് പ്രവർത്തിക്കാൻ തുടങ്ങിയിട്ട്. ഈ കാലയളവിലൊക്കെയും വീരമൃത്യു വരിച്ച പട്ടാളക്കാരുടെ മക്കളുടെ വിദ്യാഭ്യാസം ഞങ്ങൾ ഉറപ്പാക്കിയിട്ടുണ്ട്. അവരുടെ ഫീസ് ഞങ്ങൾ നേരിട്ട് സ്ഥാപനങ്ങളിൽ അടയ്‌ക്കുന്നു. രക്തസാക്ഷികളുടെ നാലോ അഞ്ചോ കുടുംബങ്ങളെ ഞങ്ങൾ ഇതിനോടകം സഹായിക്കുകയും അവരുടെ മക്കൾക്ക് ഉന്നത വിദ്യാഭ്യാസം നൽകുകയും ചെയ്‌തിട്ടുണ്ടെന്നും ജോഷി പറഞ്ഞു.

ഇത് ഞങ്ങൾക്ക് ഒരു ബിസിനസ്സ് അല്ല, ഇത് നമ്മുടെ രാജ്യത്തിന് ഞങ്ങൾ ചെയ്യുന്ന സേവനമാണ്. ഭാവിയിൽ, ഞങ്ങൾ ഒരു റെസ്റ്റോറന്‍റും ഇ-ചാർജിങ് സ്റ്റേഷനുകളും തുറക്കാൻ പദ്ധതിയിടുന്നു. 'അമർ ജവാൻ കോത്തി' എന്ന റെസ്റ്റോറന്‍റാണ് ആരംഭിക്കാൻ പോകുന്നത്. അവിടെ ഞങ്ങൾ സൈനികർക്ക് സൗജന്യമായി ഭക്ഷണം നൽകുമെന്നും ജോഷി വാഗ്‌ദാനം ചെയ്‌തു.