ന്യൂഡൽഹി: രാജ്യത്ത് ഒമിക്രോൺ കേസുകൾ വർധിക്കുന്ന സാഹചര്യത്തിൽ വിദേശരാജ്യങ്ങളിൽ നിന്ന് തിരിച്ചെത്തുന്നവർക്കുള്ള മാർഗനിർദേശങ്ങൾ പുതുക്കി കേന്ദ്ര ആഭ്യന്തര മന്ത്രാലയം. രാജ്യത്തേക്ക് തിരികെയെത്തുന്നവർക്ക് ഏഴ്‌ ദിവസത്തെ ഹോം ക്വാറന്‍റൈൻ കേന്ദ്രസർക്കാർ നിർബന്ധമാക്കി. ജനുവരി 11 മുതലാണ് ഈ മാർഗനിർദേശങ്ങൾ നിലവിൽ വരിക.
ഇന്ത്യയിൽ തിരികെയെത്തിയതിന് ശേഷം എട്ടാം ദിനം ആർടിപിസിആർ പരിശോധന നടത്തണം. തുറമുഖം വഴിയും കരമാർഗവും രാജ്യത്തേക്ക് പ്രവേശിക്കുന്നവർക്കും ഈ നിബന്ധനകൾ ബാധകമാണ്. അതേ സമയം അഞ്ച് വയസിന് താഴെയുള്ള കുട്ടികളെ ഒഴിവാക്കിയിട്ടുണ്ട്. രോഗലക്ഷണങ്ങളോട് കൂടി കൊവിഡ് പോസിറ്റീവായാൽ പ്രോട്ടോക്കോൾ പ്രകാരമുള്ള ചികിത്സ ലഭ്യമാക്കണമെന്നും മാർഗനിർദേശത്തിൽ പറയുന്നു.