ആദിത്യ എൽ1 ന്‍റെ വിജയത്തിന് പിന്നാലെ പ്രതികരണവുമായി ഐഎസ്ആർഒ ചെയർമാൻ എസ് സോമനാഥ്. ആദിത്യ എൽ 1 സങ്കീർണമായ ദൗത്യമായിരുന്നു എന്നാണ് ചെയർമാന്‍റെ ആദ്യ പ്രതികരണം.
ഇതൊരു വെല്ലുവിളി നിറഞ്ഞ ദൗത്യമായിരുന്നു എന്ന് ഞാൻ പറയില്ല. വെല്ലുവിളികൾ നമ്മൾ ഇഷ്‌ടപ്പെടുന്ന ഒന്നാണ്. സങ്കീർണതകൾ നമ്മൾ മറികടക്കേണ്ട ഒന്നാണ്. ഇന്ന് നമ്മൾ സങ്കീർണതയെ മറികടന്നു. അത് വളരെ കൃത്യമായി നേടിയെടുക്കാൻ ഞങ്ങൾക്ക് കഴിഞ്ഞു.
പേലോഡുകൾ വളരെ നന്നായി പ്രവർത്തിക്കുന്നു. എന്നാൽ ഡാറ്റ വിശ്വസനീയവും ഉപയോഗയോഗ്യവുമാണെന്ന് ഉറപ്പാക്കാൻ പേലോഡുകളിൽ കൂടുതൽ കാര്യങ്ങൾ ചെയ്യാനുണ്ട്, അതിനാൽ ഇപ്പോൾ മുതൽ അതിനുള്ള പ്രവർത്തനങ്ങൾ ആരംഭിക്കും. പ്രധാനമന്ത്രി നരേന്ദ്ര മോദി സമൂഹ മാധ്യമത്തിലൂടെ തങ്ങൾക്ക് സന്ദേശം അയച്ചു. അദ്ദേഹം ഞങ്ങളെ അഭിനന്ദിച്ചു.
ഞങ്ങൾ എന്താണോ ചെയ്‌തത്, അതിൽ ഞങ്ങൾ വളരെ സന്തുഷ്‌ടരാണ്. ഉചിതമായ സമയത്ത് അദ്ദേഹം തങ്ങളുമായി സംവദിച്ചേക്കാമെന്നും എസ് സോമനാഥ് പറഞ്ഞു.
ആകാശ സാഹസികതയുടെ നാൾവഴികൾ:ഇന്ത്യയുടെ പ്രഥമ സൗരദൗത്യം ആദിത്യ എൽ1, 127 ദിവസവും 15 ലക്ഷം കിലോമീറ്ററും നീണ്ട യാത്ര പൂർത്തിയാക്കിയാണ് ലക്ഷ്യസ്ഥാനമായ ലഗ്രാഞ്ച് പോയിന്‍റിൽ എത്തിയത്.
- 02.09.2023: ശ്രീഹരിക്കോട്ടയിലെ സതീഷ് ധവാൻ ബഹിരാകാശ കേന്ദ്രത്തിൽ നിന്ന് ആദിത്യ-എൽ1 വിക്ഷേപിച്ചു.
- സെപ്റ്റംബർ 03-15: ഭൂമിയുടെ നാല് ഘട്ടം ഭ്രമണപഥം ഉയർത്തലും വിജയകരമായി പൂർത്തിയാക്കി
- 18.09.2023: പേടകം ശാസ്ത്രീയ വിവരങ്ങൾ ശേഖരിക്കാൻ ആരംഭിച്ചു
- 19.09.2023: എൽ 1 പോയിന്‍റിലേക്കുള്ള യാത്ര ആരംഭിക്കുന്നു.
- 30.09.2023: ഭൂമിയുടെ സ്വാധീനവലയം കടന്ന് പേടകം
- 01.12.2023: ആദിത്യ സോളാർ വിൻഡ് കണിക പരീക്ഷണത്തിലെ (ASPEX) പേലോഡിലെ സോളാർ വിൻഡ് അയോൺ സ്പെക്ട്രോമീറ്റർ (SWIS) പ്രവർത്തനക്ഷമമാക്കി.
- 08.12.2023: പേടകത്തിലെ സോളാര്‍ അള്‍ട്രാവയലറ്റ് ഇമേജിങ് ടെലിസ്കോപ്പ് (സ്യൂട്ട്) പേലോഡ് സൂര്യന്‍റെ പൂര്‍ണ വൃത്താകൃതിയിലുള്ള അള്‍ട്രാവയലറ്റ് ചിത്രങ്ങള്‍ പകര്‍ത്തി
- 06.01.2024: ലഗ്രാഞ്ച് പോയിന്‍റ് 1 എന്ന ലക്ഷ്യസ്ഥാനത്തെത്തി ആദിത്യ എൽ1
ശാസ്ത്ര ലക്ഷ്യങ്ങൾ
- സോളാർ അപ്പർ അറ്റ്‌മോസ്ഫെറിക് (ക്രോമോസ്‌ഫിയറും കൊറോണ ഡൈനാമിക്‌സും) പഠിക്കാൻ
- സോളാർ കൊറോണയുടെ ഭൗതികശാസ്ത്രവും ചൂടിന്‍റെ പുറന്തള്ളലിനെ കുറിച്ചും പഠിക്കുക
- സോളാർ കൊറോണയിലെ കാന്തികക്ഷേത്ര ടോപ്പോളജിയെയും കാന്തികക്ഷേത്ര അളവുകളെയും കുറിച്ച് വിവരങ്ങൾ ശേഖരിക്കുക
- ബഹിരാകാശ കാലാവസ്ഥ, അതായത് സൗരവാതത്തിന്‍റെ ഉത്ഭവവും ചലനാത്മകതയും നിരീക്ഷിക്കു
- പദ്ധതിയുടെ ചെലവ്: 300 കോടി രൂപ
സയൻസ് പേലോഡുകൾ
- വിസിബിൾ എമിഷൻ ലൈൻ കൊറോണഗ്രാഫ് (VELC): സോളാർ കൊറോണയെയും കൊറോണൽ മാസ് എജക്ഷനുകളുടെ ചലനാത്മകതയെയും കുറിച്ച് പഠിക്കുന്നു
- സോളാർ അൾട്രാവയലറ്റ് ഇമേജിംഗ് ടെലിസ്കോപ്പ് (SUIT) സോളാർ ഫോട്ടോസ്‌ഫിയറിന്‍റെയും ക്രോമോസ്‌ഫിയറിന്‍റെയും അള്‍ട്രാവയലറ്റ് ചിത്രങ്ങള്‍ പകര്‍ത്തുന്നു. കൂടാതെ, അൾട്ര വയലറ്റിന് സമീപമുള്ള സൗരവികിരണ വ്യതിയാനങ്ങൾ അളക്കുന്നു.
- ആദിത്യ സോളാർ വിൻഡ് കണിക പരീക്ഷണവും (ASPEX) ആദിത്യ (PAPA) പേലോഡുകൾക്കുള്ള പ്ലാസ്‌മ അനലൈസർ പാക്കേജും സൗരവാതത്തെയും ഊർജ്ജസ്വലമായ അയോണുകളും അവയുടെ ഊർജ്ജ വിതരണത്തെക്കുറിച്ചും പഠിക്കുന്നു.
- സോളാർ ലോ എനർജി എക്സ്-റേ സ്പെക്ട്രോമീറ്ററും (സോലെക്സ്) ഹൈ എനർജി എൽ 1 ഓർബിറ്റിംഗ് എക്സ്-റേ സ്പെക്ട്രോമീറ്ററും (ഹെൽ1 ഒഎസ്) സൂര്യനിൽ നിന്നുള്ള എക്സ്-റേ ജ്വാലകളെ വിശാലമായ എക്സ്-റേ ഊർജ്ജ ശ്രേണിയിൽ പഠിക്കുന്നു.
- മാഗ്നെറ്റോമീറ്ററിന് എൽ1 പോയിന്‍റിൽ ഗ്രഹാന്തര കാന്തികമണ്ഡലങ്ങൾ അളക്കാൻ കഴിയും.
എന്താണ് എൽ 1 പോയിന്‍റ് :ഭൂമിയോട് ഏറ്റവും അടുത്ത് സ്ഥിതി ചെയ്യുന്ന പോയിന്‍റുകളാണ് എൽ-1,എൽ-2. ഈ പോയിന്‍റുകൾ ഗവേഷണങ്ങൾ നടത്താൻ അനുകൂലമാണ്. എല്‍ 1 പോയിന്‍റിന് ചുറ്റുമുള്ള ഹാലോ ഓര്‍ബിറ്റിലുള്ള ഒരു ഉപഗ്രഹത്തിന് മറ്റ് തടസങ്ങളൊന്നുമില്ലാതെ സദാസമയവും സൂര്യനെ വീക്ഷിക്കാം. ഇത് സൂര്യന്‍റെ പ്രവര്‍ത്തനങ്ങളും കാലാവസ്ഥയും സംബന്ധിച്ച വ്യക്തമായ വിവരങ്ങൾ ശേഖരിക്കാനും സഹായകരമാണ്.
എൽ1 പോയിന്‍റ് ഭൂമിയിൽ നിന്ന് ഏകദേശം 1.5 ദശലക്ഷം കിലോമീറ്റർ ദൂരം, അല്ലെങ്കിൽ ഭൂമിയും സൂര്യനും തമ്മിലുള്ള മൊത്തം ദൂരത്തിന്‍റെ 1 ശതമാനമാണ്. 18-ആം നൂറ്റാണ്ടിൽ ഫ്രഞ്ച് ശാസ്ത്രജ്ഞനായ ജോസഫ്-ലൂയിസ് ലഗ്രാഞ്ചിന്‍റെ പേരിലാണ് ലാഗ്രാഞ്ച് പോയിന്‍റുകൾ അറിയപ്പെടുന്നത്.
