ന്യൂഡൽഹി : ശ്രദ്ധ വാക്കർ കൊലപാതക കേസ് പ്രതിയായ അഫ്‌താബ് അമിൻ പൂനാവാലയുടെ ശബ്‌ദ സാമ്പിൾ ശേഖരിച്ച് അന്വേഷണസംഘം. തിങ്കളാഴ്‌ച സെൻട്രൽ ഫോറൻസിക് സയൻസ് ലബോറട്ടറിയിലെത്തിച്ചാണ് ശബ്‌ദ സാമ്പിൾ എടുത്തത്. ശ്രദ്ധ വാക്കറുമായി വഴക്കിട്ടതായി കേൾക്കുന്ന ഒരു ഓഡിയോ ക്ലിപ്പ് പൊലീസിന് ലഭിച്ചതിനെ തുടർന്ന് ഇതിലെ പുരുഷ ശബ്‌ദം അഫ്‌താബിന്‍റേതുമായി ഒത്തുനോക്കുന്നതിനാണ് ശബ്‌ദ സാമ്പിളെടുത്തത്.
മെയ്‌ 30 നാണ് അഫ്‌താബ് പൂനാവാല തന്‍റെ ലിവ് ഇൻ പങ്കാളിയായ ശ്രദ്ധ വാക്കറെ(27) കൊലപ്പെടുത്തി ശരീരം 35 കഷണങ്ങളാക്കിയത്. ശേഷം ശരീര ഭാഗങ്ങൾ മെഹ്‌റൗളിയിലെ തന്‍റെ വസതിയിൽ മൂന്നാഴ്‌ചയോളം ഫ്രിഡ്‌ജിൽ സൂക്ഷിക്കുകയും ഡൽഹിയിലെ വിവിധ ഭാഗങ്ങളിൽ വലിച്ചെറിയുകയും ചെയ്‌തു. നവംബർ 14 നാണ് അഫ്‌താബ് പൊലീസ് കസ്‌റ്റഡിയിലാകുന്നത്.